The Weeknd-a’n Gaza tan $2M thawh

The Weeknd, a hming tak Abel Tesfaye chuan a XO Humanitarian Fund kaltlangin, Gaza-a indona avanga eitur nei lo ten eitur an neih theih nan chhang phut matric ton 1,500 chuang man tur, dollar maktaduai 2 a thawh a, hei hi World Food Programme-ah a chhunglut.
WFP chuan niminpiah khan thuchhuah siamin, Abel Tesfaye hnen atanga an pawisa dawn hi Palestinian 1,57,000 chuang tana thla khat ei tur, chhangphut metric ton 1,500 chuang lei nan an hman tur thu an puang a ni.
Tesfaye hi United Nations World Food Programme Goodwill Ambassador a ni a, ani hian nikum December pawh khan Gaza pualin WFP-ah hian dollar maktaduai 2.5 a lo thawh tawh, a fan-te pawh Gaza-a WFP hmalakna te theih tawpa tawiawm ve turin a lo sawm tawh bawk a ni.
Mithiam te chuan Israel leh Hamas indona avangin Palestinian maktaduai chuang chu thlaruk chhung vel chaw kham khawp ei tur an nei taw lo niin an puang a ni. Hamas ten Israel inring lo lai bei thutin, Isael mi 1,200 chuang thatin, mi 250 chuang an kidnapped bawk a, chung zingah chuan hmeichhia leh naupang bakah kum upa lam te pawh an tam hle a ni. Israel chuan Hamas beihna hi chhangletin Gaza chu indona hmunah a chang ta a ni.
WFP USA persident/CEO Barron Segar chuan, “Abel-a’n WFP-in Gaza-a riltam te pum hnawh puar tura kan hnathawh te a support thin avangin kan lawm hle mai. Riltama kan awmna chhan hi mihring te vekin buaina kan siam vang a ni thin a, chutiang chu sutkian theih a ni. Khawvelah hian mi zawng zawng hrai puarna tur daih chaw a awm a, chutiang tura kan mamawh chu funding a ni. Abel-a chungah kan lawm, chhungkua tam takin an mamawh em em ei tur an nei dawn ta a ni,” a ti.
Abel Tesfaye leh a thawhpuite chuan he Fund atan hian dollar maktaduai 6.5 an thawkchhuak tawh a, Abel hian Gaza relief atan dollar maktaduai 4.5 a sik chhuak tawh a ni.