Amit Shah thusawi tihdanglam vangin police hnenah BJP zualko

BJP Mizoram chuan tunhnaia Union Home minister Amit Shah thusawi, a sawi ang niloa post darh awm chungchangah Mizoram IGP Lalbiakthanga Khiangte hnenah FIR an thehlut.
BJP Mizoram sawi danin, tunhnai khan social media lamah Amit Shah thusawi ni awm tak, BJP a sawrkar leh chuan ST/SC/OBC reservation hlih a ni ang, tiin thu thehdarh a ni a. Hemi chungchangah hian Delhi Police-te hnenah FIR thehluh ni mah se, he thu vek hi state hrang hrang, Mizoram tiamin thehdarh a ni a, a thehdarhtute thudik hrilh an nih hnu ah pawh an thehdarh chhunzawm zel avangin dan anga an chunga hremna pek a nih theih nan state tinah FIR hi thehluh a ni tih an sawi.
Hei mai hi niloin, sakhuana thila thudik lo hmanga beihna BJP hian a tawk chamchi tih an sawi a. FIR thehluh thin niin, tun tumah erawh central thurawn anga chak zawka hma lak a nih theih nan State Police hotute hnenah FIR thehluh a ni tih an sawi a ni.
‘Political party kan nih angin politics-a inbeihna hrang hrang kan tawk tur a ni tih kan pawm a. Nimahse dawt leh sakhuana hmanga mipui rilru la kawi thei zawnga beihna erawh dan anga hrem an nih zel theih nan leh thudik hailan a nih a, Mizo mipuiin rin tur leh zui tur dik kan hmuha kan hriat theih nan political party-te pawh mipui hnenah thu sawi thin turin kan ngen a. Mizoramah development tak tak, tunhma atanga kan beisei leh kan duh em em a lo thlen theih nan BJP Mizoram chuan theihtawp kan chhuah zel dawn a, party hrang hrangin mipui hmaa kan inzawrhna, kan manifesto tihpuitlin hi kan inelna ni zawk turin political party-te kan cho duh a ni,’ a ti.