Ram neih tam lutuk venna tur dan siam rawtna bawhzui dawn

Ram neitu in a neih tam ang zela chhiah a chawi tam theihna tur dana siam rawtna chu House-ah sawi ho a ni a, hemi bawhzui tur Committee din a ni.
Assembly Session kal mekah Zirtawpnia private member resolution/ bill lak thinah The Mizoram (Land Revenue) (Amendment) Bill 2023′ chu bill neitu, member Dr Vanlalthlana’n House-ah a pulut a. Huan lo ram chhiah lakna atan emaw ram neih danah emaw ram neih len zawng emaw chhiah lak tih danglamna tur a ni tih a puluttu hian sawiin, “Mihring kan tam telh telh a, mi hausaten ram an enkawl theih loh thleng pawha lei an ching chho ta niin a hriat a, mirethei zawkte tan ram lei tur a vang tial tial a ni,” a ti.
Sum khawlna atana tha bera kan ngaih chu ram neih a nih thu te, dan loa sum lallututen an sum dahbona hmanrua atan ram lei tur an zawng a, a ngam huai huaia an tan thu te sawiin, “Hetiang a nih zel chuan hausa ve lo tan ram lei ngaihna a awm lo mai ang tih a hlauhawm a, kan tu leh fate tan chenna ram buatsaih hi MLA te mawhphurhna a ni. Dan siamtu leh dan kengkawhtu kan nihna a lan a ngai thin,” a ti a. Progressive tax system hi hman rawtin, he Bill hian department tan sum hman belhna tur a keng tel lo tih a sawi bawk.
Hei bakah hian SEDP hnuaiah huan lo ram neih dan siamthat tuma land reform mumal taka kalpui tumna a awm avangin ruling lam tan policy-a an dah reng a nih thu Dr Vanlalthlana hian a sawi a ni.
Member engemawzatin an sawi zui a, bill tum ber chu tha an ti tlang tih an sawi a, enthat ngai an tih laite an sawi. ZPM Legislative Party leader Lalduhoma chuan an hausak chhan hriatchian mang loh hausa thut ten in hmun lo ram, a bikin Aizawlah an lei nasa a, hei hian kar loah in hmun lo ram man a ti to nghal a. Mi hausa ram a tam tawh, a dan dan ngaihtuah thuai loh chuan reilote ah kan ram pumpui chu mi hausa zaa 20 vel kutah a tlulut mai dawn a. Chu chuan kan society, politics, NGO leh kohhran thleng pawhin a rawn thunun dawn tiin a sawi a. Zirchian ngaite chu bill pass hnu ah zirchian ni mai se, House-in pass nghal a hreh deuh a nih pawhin Select Committee ah emaw tala refer a, he thil hi a bul tan a tul tih a sawi a ni.
Congress Legislature Party leader Zodintluanga pawhin he bill hi an thlawp tih a sawi a. Land Reveune minister Lalruatkima chuan he Bill-in a tum leh a dan duh ang chu dan awmsa ah pawh a huam tho a, hetiang dan siam dawn chuan a phek lehlam lehlam uluk taka ngaihtuah ngai a awm thin a, sawrkar pawhin SEDP hnuaia Land & Survey Board kaltlangin a ngaihtuah lai mek a ni, tih te a sawi.
House leader, chief minister Zoramthanga chuan hetiang dan neih hi hun rei tak a lo ngaihtuah tawh, a ‘dream’ a ni tih a sawi a. Tha a ti a, a taka kalpui pawh a tul tawh hle tih sawiin, enthat ngai awm thei a nih avangin Select Committee din a rawt a ni.
Speaker kaihhruaina in bill pass duh leh duh loh emaw, Select Committee kuta dah emaw buk a ni a. Select Committee kuta dah duh an tam zawk avangin, din tha tih a ni a. Rawtna lut angin rawt angin Committee chairman-ah Dr L Thangmawia ruat a ni a. Member atan Lalruatkima, Dr Vanlalthlana, Lalrindika Ralte, Dr BD Chakma, Dr K Pachhunga leh K Laldawngliana te House-in a pawm a ni.