Ram hruaitute inhaivurna VUC-ah thlen

PC party chuan MLA-te inhaivurna uchuak leh Assembly speaker car thar chungchang ZPM Val Upa Council hnenah Thawhtanni khan ziakin an thlen.
PC president Vanlalruata chuan ram hruaitute khawsak dan tha an tih loh dan sawiiin, “Fate chawhmeh ren zirtir chunga chawm bawka hawp bawk ang an ni,” a ti a. Inrenchem an sawi reng laiin uchuak takin an invulh a, simple interest-a kum khata 5.5% leka pung turin MLA 40-in public money atangin kuminah cheng nuai 1050 puk an tum tih a sawi.
“Hetiang em em hian MLA term kal tawha MLA-te an la invulh ngai lo. Mipui min zah loh dan hi a uchuak a ni,” a ti.
Lirthei lei loh uar taka an sawi laiin, speaker tan lirthei changkang uchuak lei a ni tih pawh sawiin, “Hetianga speaker hman tur leina atan hian nikum leh kumina budget-ah sum ruahman a awm loa, lirthei an lei dawn a nih pawhin hetianga changkang leh manto uchuak hi mamawhna a awm lo,” PC president hian a ti.
ZPM campaign auhla sawichhuakin, “Kan kalsual dawn a niha ‘het’ lo ti tur Val Upa Council kan nei, an ti thin a. An kalsualna chu an VUC-ah chuan kan thlen ta a. Enge an tih kan en ang,” Vanlalruata hian a ti. Hemi chungchang hi an umzui zel dawn a, an phawrh thui tial tial dawn tih a sawi.