Tripura-a rubber chin dan zirchianna report thehlut

Tripura-a CM Rubber Missions kalpui dan zira kal Land Resource, Soil & Water Conservation department official team chuan Thawhtanni khan chief minister Lalduhoma hnenah an zinna report an thehlut a, Mizorama Chief Minister’s Rubber Missions kalpui dan tur ruahmanna an thlen nghal.
Chief minister hian nikum December 23-a Rubber Board of India chairman Dr Sawar Dhanania nena an inkawmna kal zelah LRS&WC department thawktute hi Tripura sawrkarin 2021 August atanga Rubber Missions a kalpui dan zirchiang turin a ti a. Department hian officer pathum tira an zu zirchian hnuah an zin report hi chief minister hnenah an hlan a ni.
Tripura-in kum 2021 atanga Rubber Board, NABARD, In-road programme, ATMA leh MGNREGA tangkhawm hmanga an kalpui, CM Rubber Missions hi ram hectare 30000 huamchhungah an kalpui a. An zirchianna behchhan hian Mizoram mila tha leh felfai zawka kalpui dan tur tlangpui pawh duang nghalin, a tul anga la thlir zui zel nise, an ti.
Study Team hi LRS & WC secretary Dr Lalzirmawia Chhangte leh director Hualthanga Chhakchhuak ten an ho a ni.