Champion-te Sports minister-in a lawmpui

Indian Super League 2024 zawh taka champion team Mumbai City FC player pawimawh pahnih – Lalengmawia Ralte (Apuia) leh Lallianzuala Chhangte te chu Sports minister Lalnghinglova Hmar chuan Thawhlehni khan lawmpuina a buatsaih.
Minister chuan Apuia leh Lianzuala te chu Mizo hming timawitu an ni a, an chhuang takzet tih a sawi. An thawhrimna avanga hetiang dinhmun thleng chho thei an ni a, an nuna entawn tur pawimawh pakhat a hriat chu an inngaitlawm em emna a ni tih a sawi a. An eichak zawng zawng, an tih chak zawng zawng ti loa an insum theihna avanga tun dinhmun thleng thei an ni, tiin, “Mizo thalaiten an nunah entawn tur kan ngah hle,” a ti.
India chu khawvel huap football-ah sang lem lo mah se, India team-a tel phak ringawt pawh a har takzet tih Lalnghinglova Hmar hian sawiin, an ni pahnih phei chu first eleven chang ngei tura ngaih leh beisei an ni tih a sawi. Lianzuala phei chu a chhuanawm lehzual tih sawiin, “ISL-ah season khat aia tam goal 10 khung thei awmchhun niin, Indian Super League an champion theihna tura thawhhlawk ber a ni,” a ti.
Lalengmawia Ralte leh Lallianzuala Chhangte te hi India football team-a khel tura koh zui an ni a. Lalengmawia Ralte erawh master degree exam hmachhawn tur a nih avangin India team a zawm ve thei dawn lo a ni.