Inrenchem chuan tuialhthei harsatna a zia theih beisei

Tunlaiin tuialhthei lei tur a awm lo palh ang tih hlauvin lirthei neitute an inla khawl a, Food, Civil Supplies & Consumer Affairs (FCSCA) department lam chuan harsatna a thlen zui loh theih an beisei a, mahse inrenchem tlang ila an ti.Inrenchem tlang ila, mamawh bak inla khawl lo ila, inkian thiam ila, chutianga kan tih chuan harsatna a thlen loh theih kan beisei, department hotute chuan an ti.
Mizoramah petrol leh diesel a tlem lo tih an sawi a, mahse a lakluh lamah harsatna a awm theih avangin inrenchem hi tul an ti.
Assam-ah tuilianin rel kawng a tichhia a, he kawng hi Guwahati Depot-ah petrol leh diesel lakluhna kawng a ni. Guwahati atanga la chhawng Mizoram leh hmun dang a nghawng a, hei vang hian tun hnaiah FCSCA department chuan fimkhur thu-ah petrol leh diesel hi an ‘control’ a ni. Mahse Thawhtanni zan atang khan hei hi an titawp leh.
‘Mizorama awm zat te kan han thlir a, kawnga thang mek te, tin, a phurtute thang rei zawng te, chutiang te han ngaihtuah chuan control lo ila, inrenchem tlang ila, mi dang kian thiam ila, chutianga kan tih chuan a inbanlek tawk vel ang kan ti a ni,’ tiin FCSCA department hotute chuan The Aizawl Post an hrilh.
Thawhtanni tlaiah khan Aizawla filling station hrang hranga an neih zat te an en a, a tlemah an ngai lo.
Rel kawng chhia hi ni 10-ah siam zawh hman beisei a ni tih chu an thu dawn a ni a, mahse tui a lian zel em tih te, ruah a sur em tih te ngaihchan a ngai tih an sawi a, thu thar an la hre lo tih an sawi.
Guwahati Depot-ah pawh hian tuialhthei a tlem nghal tihna a ni lo a, a thleng thar pawh a awm a, a thleng muang deuh thung tihte an sawi a, a phurtute an intlar rei avang te, kawnga an thang chhung te chhut tel a tul thu te, chuvanga inrenchem hi tul a nih thu an sawi. Chutih rual chuan, control loh an tih chhan hi, duhtawka lak tur a awm vang a ni lo a, an control hian mipuiin inlak khawl an tum phah ang tih hlauhna a awm tih te an sawi bawk.