‘Mo Sual’ film leak out avangin mi pahnih man

Melody G Fanai direct Mizo film’ Mo Sual’ leak out avangin Lalrinfela leh FC Lalhualhima, Lawngtlai mi ve ve te chu man niin, thu zawhfiah an ni a, film siamtu Melody G Fanai chuan midang rinhlelh an la neih thu leh chhui zel an la nih dawn thu a sawi.
Mo Sual film hi streaming app-ah man chawia en theih tura an tlangzarh hnu lawkah a screen record a leak out ta a, hei vang hian April ni 26, 2024 khan Cyber Crime lamah film siamtu te hian FIR an theh lut ta a ni. Cyber Crime police ten chhui nghalin,filmti-leak out-tu ni a puh Lalrinfela, Lawngtlai chu manin, thu zawhfiah a nia, ani hian a account midang a hawhtir ni a sawiin, nimin khan film ti-leak out-tu a puh FC Lalhualhima, Lawngtlai chu man lehin, thu zawhfiah a ni leh ta a ni.
Film siamtu Melody G Fanai chuan Mo Sual leak out avanga complaint an theh luh atanga Mizoram Police leh Cyber Crime thawktu ten chak taka hma an lak avangin lawmawm a tih thu a sawi a, hetianga hma a lakna chhan sawiin, “Ka thiante, film siamtu te leh lemchan lama inhmang te leh thalai te tan hetiang kawngah hian eizawnna tha zawk a lo awm theih nan tuna thil thleng hi theih tawpin tan ka la a, awareness kan neih that lehzual phah ka beisei a, tangkaina pakhat tal a awm theih nan ka fight a ni,” a ti.
He film leak out avang hian an sum hmuh let ve tur anga an lo beisei pawh an hmu thei tawh dawn lo a a ngaih thu sawiin, “Hetianga Mizo film siam leak out hi a awm fo tawh a, thuneitu ten man te pawh an lo nei tawh thin. Hetiang a nih zel chuan Mizo film industry hian hma a sawn thei dawn lo a, sum tam tak senga film siam ngam an awm lo mai ang. Chuvangin heti lamah hian awareness kan neih lehzual theih nan theih tawpin ka bei let ve a ni,” a ti bawk.