MZP-in chairman hlui chhanglet MPSC chhuina report an pawm lo

Mizoram Public Service Commission kalchhuak ta JC Ramthanga thusawi chu Mizo Zirlai Pawl chuan a chhanglet a. Mizoram Public Service Commission hnalak dan phung chhuichiangtu thil hmuh dan chu pawm theih a ni lo tih an sawi bawk.
MZP Gen. Hqrs. thuchhuak chuan, Mizoram Combined Competitive Examination leh Asst. Conservator of Forest (ACF) hna lakah thil diklo awm nia ngaiin, MPSC chairman chu mawh laa bang turin an lo ngen tawh a. An ngenna leh hmalaknain awmzia a neih loh avangin MPSC office kai tur an dang a. Mizoram sawrkar hmalaknain Vigilance department chuan inquiry officer ruatin, hnu chhui hna kalpui a nih chhung chu police venna hnuaiah MPSC office awm tura tih a nih laiin, inquiry officer ruat hnu April 16 tlaiah MPSC thawktu thenkhat a rukin office-ah an lut tih hriat a ni a, a zan a zanin MPZ pawhin punkhawm a huaihawt leh phah tih a sawi.
MPSC hna lak dan chhui tura ruat IO-in “thil fello a awm lo” tia report a thehlut chu an pawm thei lo tih MZP hian sawiin, hun rei tak MPSC enkawl tawhtu a nih vangin, MPSC mualpho loh na turin thutlukna a siam mai em ni tih chu an zawhna a ni tih a sawi a ni.
MPSC hna laknaa answer paper leh mark tabulation-ah correcting fluid nasa taka hman a ni chungin tihsual an nei lo chu MZP chuan mak a ti a. Answer paper leh mark tabulation-ah correcting fluid duh duha hman an phal tihna a ni, tiin, ‘Mi thenkhat mark siamthatna initial thlap thlap a nih lai a, mi thenkhat mark correcting fluid hmanga tih that a ni bik chu thil fair takah kan ngai thei loa, duhsak zawngte tih tlin theihna kawngka zau tak system MPSC-in a hmang hi a him lo,’ a ti.
ACF hna lak, exam vek tawh hnua answer paper endik loh tur tih chu inquiry officer hian a chhui tel em tih MZP chuan a zawt a. Department recruitment rules ang ni loa exam conduct-tu MPSC chuan mawhphurhna la in, exam tawh hnu answer paper hi endik tlang ngei se a duh tih a sawi a ni.
MPSC chairman chhuak ta Pu JC Ramthanga chu MPSC-a thil thleng zawng zawngah mawh laa bang tur a nih lai a, a bang ngam lo chu a hun kal tawh enin MZP chuan awm a ti hle tih a sawi bawk.
‘Addl. chief secretary a nih lai November 2020 khan a makpa chu Covid chhuanlamin one time relaxation hmangin Mizoram Engineering Service-a thun tum tawhtu a ni a. MZP hmalakna avangin an titlang ta lo. Chief secretary nih a duh avangin, amah aia senior zawk chief secretary ni theite nasa taka tibuai tawhtu a ni bawk. MZP hmalakna avangin kum 1979 khan tribal quota titawp tura Parliament in hnihin a pass tawh pawh India President-in a lo hnawl phah tawh tihte Pu JC Ramthanga hian hria se MZP chuan a duh,’ thuchhuah chuan a ti.
Inquiry officer pakhatin, thiam chantir mah se, MPSC dik lohna chu a dik ta tihnaah a ngai lo tih MZP hian sawiin, MPSC dik tak a awm theih nan a enzui zel dawn tih a sawi a ni.