Thenzawl mibo zawng mek

May 4 tlai atanga a chin hriat loh Lalrinhlua (28) s/o R Lalzawna, Thenzawl Hermon Veng chu May 9 thleng khan hmuh a la ni loa, Thenzawl khawtlangin an zawng mek.
Kar kalta Inrinni tlai dar 4.00 vel khan Lalrinhlua hi an in bulah hmuh a ni a, a hnuah a bo zui a ni. A tuk Pathianni chawhnu dar 2.00 velah Sailam Lau phaia thlam pakhatah hmuh niin, thlam enkawltute hian chaw an lo pe a, mibo tih an hriat loh avangin an kalsawn tir ve leh mai a, heta tang hian hmuh zui a ni tawh lo.
Thenzawl Joint VC leh Joint YMA ruahmanna in Lalrinhlua hi khawtlang chuan tunkar Thawhtanni atang khan zawng tanin, Ningani khan khawtlang huapa bo zawnga an thawhchhuah ni li-na a ni.
Lalrinhlua hi rilru lama tlema mi pangngai phak lo deuh a ni a, a bo lai hian t shirt hring banbul leh kekawr dum ha in, chapal – (crocks) a bun a. Amah hi lirthei phar a, chuang ve mai thei a nih avangin Zoram hmun hrang hrang ami te lo ngaihven pui turin Thenzawl khawtlang hruaitute chuan an ngen a ni.