Project lian thawh mek vil uluk tum Airport-a contractor zirchiang dawn

State Project Monitoring Committee chuan project lian thawh mek an en tawh ho chu uluk taka vil zui an tum a. Lengpui Airport cheithata contractor chu zirchian an tum bawk.
Mizoram State Project Monitoring Committee (MSPMC) h an chairman, chief minister Lalduhoma hoin Zirtawpni khan an thukhawm a. Tunhnaia hmasawnna hnathawh an endikte an thlirho. Committee inpekna leh thawhrimnaah chief minister hian lawmthu a sawi a. An hnathawh chuan rah tha tam tak a chhuah ngei dawn tih a hrilh.
Committee vice chairman R Lal Rinawma chuan tunhnaia a hmuna an endik – Lengpui Airport tihchangtlunna hna thawh mek, Lengpui Motor Sports Project thawh mek, Maumual Protective Home-a brick wall boundary fencing thawh, Solid Waste Management Centre Hualngohmuna thawh mek leh Ropuiliani Freedom Fighter Museum Kelsih thawh mek report a pe a. Kalpui zel dan tur an sawizui.
Lengpui Airport bikah hian flyover bridge concrete work an zo tawh a, bitumen work erawh a that tawk loh avangin a thawktuten tihnawn leh an tum. Terminal building hluia double height awmna lai, void slab chu la chhun loh a ni a, a bungrua erawh lei tawh a ni. Void slab hian hna dang thawh zel tur a tihkhaihlak theih avangin thla thum chhunga thawh awh nise, an ti. Ceiling leh electric wiring, canopy leh thildang thawh tur a la awm nual a, rang taka hna chhunzawm tul an ti. Fire safety inspection neih nise tha an ti bawk.
Baggage make-up area pahnihna tur thawh mek, airport sinage mawi leh changkang tak neih, security thil, power supply mamawh belhna, hnathawh mek tichak tura pindan awmsa siksawi thuai tul thu, hna thenkhat a tira estimate-a awm lo, a hnua bilh tel leh takte a tul anga bawhzui chak tha an tih thu sawi a ni a. Baggage make-up area siam zawh tawhah hian a rang lama conveyor belt dah a nih tur thu sawi a ni. Thil dang pawimawh, departure ramp leh aero bridge, hnathawktu department ho inkarah thawhhona tha a awm a tul tihte an sawi a, contractor chungchang pawh zirchian nise an ti.
SASCE sum vbch. 16.64 senga thawh mek Solid Waste Management Centre Hualngohmuna chu an endik bawk a. Nodal department UD&PA a ni. Sum hi mobilization advance nuai 73.07 pek chhuah tawh niin, contractor hi V Lalbiakzama a ni a, a hmunhma buatsaih hna an thawk mek. He hmalakna hi uluk taka zirchian leh vil zui a tul niin an ngai.
Ministry of Tribal Affairs sum vbch. 18 hmanga thawh Ropuiliani Freedom Fighter Museum Kelsih hi 2021 January 19 khan work order tihchhuah a ni a. Contractor hi Rollins Engineer niin, thawh zawh hun tura tih chu 2023 January 19 a ni. Nodal department Social Welfare & Tribal Affairs a ni. Hnathawh mek hi uluk taka vil zui a ngaiin an hria a; he project hi sawrkar laipui lamin an ngaihlu hle a, kumina rawn hawn hman hial an duh avangin a hlawhtlin ngei a tul tih sawi a ni.
Lengpui Motor Sports Circuit hi Rural Electrification Corporation Ltd CSR cheng vaibelchhe 7.5, SASCE sum vbch.8 leh state sum vbch. 2.5, a vaiin vbch.18 senna tur niin, CCR Enterprise Lengpuiin an thawk a, nodal department chu Mizoram State Sports Council a ni. A hmunhma laih (formation cutting) an zo tawh a, pavement an thawk mek. An hnathawh tawh chin a tha thawkhata ngaih a ni a, Chiahpui atanga a hmunhma panna kawng erawh a chhuk chhoin a zim deuha ngaih a ni. Hnathawh hi uluk taka enzui zel tha an ti.
Maumuala hmeichhiate enkawlna In (Protective Home) Article 275 sum, nuai 125 senga brick wall fencing hnathawh an endik chu thawk tha nia an hmuh thu an sawi.
An thil hmuh leh an sawikhawmna behchhan hian a endiktu team hian rawtna mumal tak duang se, a mawhphurtu department lama thehluh nise an ti.