Tlabung P/S-II office sa chhia

Govt. Tlabung Primary School-II office building sak chhia leh Tlabunga zirna in tlabal lutuk chu thuneituten a rang thei ang bera enfiah a, hma la turin an ngen tih Mizo Zirlai Pawl chuan an sawi.
MZP Hqrs Lunglei leh MZP Sub-Hqrs Tlabung chuan Zirtawpni khan Govt. Tlabung P/S-II office building sak hi an endik a. Office building satute hian an hna an namnul hle a, a bang atana thingphek hman chu nawh mam miah lohte, a tukverh atana thingphek hman pawh kalh theih loh khawpa chhia in an siam tih an sawi.
Veranda kal ka bera hman atana hnathawktuten chartin pahnih chauh hmanga siam a ni a, zirtirtute thahnemngaiin anmahni sum hmangin an siamtha leh tih an sawi a. Tukverh kamna atana thing bung an hmang a, rawng hnawih pawh hnawih nawn a awm miah loa, electric wiring engmah khawih loin hnathawktute hian an insaseng san tih an sawi bawk.
Govt. P/S -II Tlabung chu Tlabung khuaa primary school pali awm zinga Mizo naupang kal tamna ber niin, Tlabung P/S ah chuan a pawimawh ber pawl a tih theih hial tih MZP hian sawiin, hetiang a nih laia office building sakthar chhe lutuk, school main building chhe lutuk avanga class II leh III zirlaite room khata khung an ngai tih MZP Hqrs Lunglei hian a sawi a. Blackboard hmantlak mumal a awm loa, ceiling chhiat lutuk vangin ruahsur changin class a lak theih miah loh tih a sawi a ni.
‘Thuneitun a rang thei ang berin Govt. P/S -II Tlabung office building sak chhe lutuk hi enfiaha hma la turin kan ngen a. Zirlai 42 awmna school-a zirtirtu pathum chiah an awm hi thuneituten a rang thei ang bera hma la turin kan ngen bawk,’ an ti.