Hlawh lak kawp ka duh ve lo – K Hrahmo, MLA

MLA leh MDC chu nih kawp theih mah se, MDC a nihna a dahtha a, hlawh lak kawp a duh ve lo tih BJP MLA K Hrahmo chuan a sawi.
Zirtawpnia BJP State office-a inkhawmah Palak bialtu MLA K Hrahmo chuan, MLA leh MDC hi a nih kawp theih tih hre mah se, MDC a nihna dahthat tula a hriat bakah MLA leh MDC-a a hlawh chu pakhat zawk zawka lak thaa a hriat avangin, MLA hlawh chauh a la a, MDC a nihna pawh banna a thehlut tawh a, MDC by election a bial chhungah ngei an nei dawn a, BJP MDC tha tak an neih belh dawn, tiin a sawi.
Hmarchhak state-a BJP/NDA sawrkarna ho chu sawrkar laipuiin an thu leh hla a ngaithla a, state hmasawnna pawh nasa takin an dawng mawlh mawlh a. Mizoramah erawh BJP kan hriatchian loh avangin kan hnawl a, dawt hmanga BJP beihna hi Mizoram mipuiin thudik kan hre zel dawn tih BJP MLA hian a sawi. “Politics-a kan beisei ber development hi Mizoram mipuiin hmuh kan duh tawh a, sawrkar tawhten min pek theih loh avangin, BJP development party hi ram mipuiin kan sawrkar tir ngei ngei tawh dawn a ni,” a ti.
BJP Mizoram MP Election in-charge Devesh Kumar pawhin India ramah BJP-in sawrkarna an chang leh dawn tih a sawi a. Mizoram mipuiin hmasawnna an duh avangin sawrkar thar an thlang chhuak a, beisei an phak lo a nih chuan mipuiin kan duh ber development min pe theitu tur BJP kan la thlang ngei dawn tih a sawi a ni.