Lungleiah Nurse Day hmang

Trained Nurses Association of India Lunglei District Branch buatsaihin Zirtawpni khan International Nurses Day 2024 hman a ni. Kumin thupui chu “Our Nurses, Our Future, The Economic Power of Care” tih hman a ni.
Hmanpuitu, Lunglei addl DC James Miahlung chuan damdawi ina damlo dawnsawn dan leh enkawlnaah mipuiin an dahsan thin angin, missionary rilru pu chunga damlote dawngsawnga enkawl turin a chah a. Tunlai thiamna mila an rawngbawl sakte, tun aia thaa enkawl dan a awm em, tih ngaihtuah chunga inzirbelh zel turin a chah.
Kumtinin Florence Nightingale piancham hriatrengna atan May 12 hian International Nurses Day hman thin a ni a. Kumin International Nurse Day hi Pathiannia a tlak avangin Zirtawpni hian hun hman a ni. Hriselna huanga nurse-te thawhhlawk zia inhrilh tharna atan hman a ni.
Nursing School Lunglei, Nursing School Serkawn, Civil Hospital, Christian Hospital, Serkawn, Hope Hospital leh Faith Hospital Lunglei atangin special item an entir a. Nurse chawl tawhte pawhin an hmanpui.