Bangladesh atangin raltlan lut thar leh

Hun engemaw chen a hlawma lut thar an awm loh hnuah Bangladesh a\angin Mizoramah raltlan a hlawmin an lut leh a, mi 160 chuang an ni. May ni 10, Zirtawpni khan Bangladesh atanga tlanchhia mi 160 chuang Mizoramah an lut leh a, Lawngtlai district-a Hmawngbu leh Chamdur P-ahte an awm rih.
Hmawngbu-a awmte hi Bangladesh atanga tlanchhia ni mah se Myanmar atanga Mizorama lut an ni a, an khua atanga an tlanchhiat hnuah hun engemaw chen Myanmar-ah an awm a, chuta tang chuan Hmawngbu-ah an lut a ni tih thu dawn a ni.
Thu dawn danin, Bangladesh-a Chittagong Hill Tracts-a Zo hnahthlak, an sahimna zawnga Mizorama luh tum an ni a, mahse Mizoram lamah BSF an awm avangin Myanmar-a Samang khuaah an kal ta a ni. Hei hi nikum lam daih tawh a ni a, Samang-ah hian hun engemaw chen an awm a, tun hnaiah Mizoram an lut ta a ni.
Hriat theih chinah Samang atanga Hmawngbu-a lutte hi mi 47 vel an ni.
May ni 10-ah vek khan Chittagong Hill Tracts atanga tlanchhia mi 127 vel chu Mizoramah an lut a, anni hi Chamdur P-ah hruai thlen niin, hetah hian an awm tawh.
Thu dawn danin, Chittagong Hill Tracts-a khaw paruk, Eden, Mualpi, Munnuam, Fiangpidung, Pankhiang leh Rumana khaw mite an ni a, Mizoram an luh hian Mizorama mi tlawmngaite’n lo hmuakin Chamdur P-ah an hruai a ni.
BSF lam pawhin a hmunan enfiahin an chhinchhiah nghal a, BSF hi chuan mi 131 tiin an chhinchhiah nia hriat a ni.