TNT-ah mental health camp

Mizoram State Legal Services Authority (SLSA) leh Mizoram University Department of Clinical Psychology tangdun chuan May 17 tlai khan TNT Muanna Vengah Mental Health Camp an buatsaih.
Health camp hmanpuitu Gauhati High Court chief justice, Mizoram SLSA patron -in- chief Justice Vijay Bishnoi chuan TNT thiltih chu ropui a tih zia leh a dintu Dr Sangthankima fakawm a tih thu a sawi a. MZU Department of Clinical Psychology atanga kalten rilru lama harsatna neite puihna lamah hna tha taka an thawh theih avangin lawmthu a sawi bawk.
Mizoram SLSA chu mi zawng zawngin rorelna dik an chan theih nana dan chungchanga puihna (legal aid) a thlawna pe thei an nih bakah rilru lama harsatna nei, vohbik leh mi hnuaihnung leh harsa dang tana programme tam tak buatsaih thintu an ni, tiin, mipuiin kan hriatrenga kan hman tangkai a beisei tih a sawi a ni.
Gauhati High Court judge, Mizoram SLSA executive chairman Justice Michael Zothankhuma leh TNT dintu, Padma Shri Dr Sangthankima ten thu an sawi a. Gauhati High Court judge Justice Marli Vankung leh Mizoram SLSA hotute an tel bawk.