Cheng nuai 5 chin cashless-a inenkawl theihna kan duang – Health minister

Universal Health Care Scheme hnuaiah cheng nuai 5 thleng pawisa pek ngai loa damdawi ina inenkawlna theihna tur Mizoram sawrkarin a duang tawh tih Health & Famiy Welfare minister Lalrinpuii chuan a sawi.Thawhtannia ZPM office-a inkhawmah ZPM hruaitu ni bawk Lalrinpuii chuan, Health Care Scheme chu nasa taka zirchian ngai a nih avangin uluk takin vawi tam official-te nen an sawiho a; tunah hian mipui huapzo ‘Universal Health Care Scheme’ chu a taka kalpui a nih theih nan hma an la mek, tiin, “He Health Care Scheme-ah hian cheng nuai 5 thleng pawisa pek ngai loin damdawi inah kan inenkawl thei dawn a ni,” a ti.
Social Welfare & Tribal affairs minister Lalrinpuii chuan, an hmachhawp zing ami, kum upa pension cheng sangkhatin an tipung a, upa leh rualbanlote tan awlsam zawka Civil Hospital-a an inentir theih nan a hranpaa counter siam a nih bakah an ni bik tan hian card eng siamsak a ni a. Rualbanlote tan awlsam zawka office dawr theihna buaipui mek ni bawk tih a sawi.
“Hun vawn dik chungchangah biometric attendance kalpui mek a ni a. Ka department chan office hrang hrangah pawh hman mai theih turin kan buaipui mek. MLA-te kan buai thin em emna pakhat, ruang phurh chungchangah budget-ah nuai 500 kan dah tawh a, hei hi cabinet thutkhawm hmasa berah min pawmpui turin kan peihfel tawh a ni,”a ti.
Anthurium Festival tihtawp a ni dawn tih a sawi a. Mizoramah festival pahnih – Winter Festival leh Anthurium Festival hi central sawrkar hriatpui festival leh tanpuina sum min pek thin a ni a; Anthurium Festival hi mipuiin an ngaihhlu tawk lo nia kan hriat avangin tihtawp a ni a, a aiah Leitlangpui Music Festival chu Lungleiah nei tura hma lak a ni,” Tourism minister Lalrinpuii hian a ti.