White House-in sirkhat thlirna chauha pawmpuina a hnawl thu sawi

White House chuan Ireland, Norway leh Spain tena Palestinian state an pawm thu an sawi hnuah ‘sirkhat thlirna chauha pawmpuina’ chu a hnawl thu sawiin mahse Israel chu fund pek chhunzawmlohah a vau ve thung.
President Joe Biden chuan ‘two-state solution a thlawp’ tiin National Security Advisor, Jake Sullivan chuan a sawi a.
“Mahse two-state soulutin chu sirkhat nei chauha pawng pawm ni lovin inbiak remna hmanga chinfel turah a ngai a ni” tiin a sawi bawk.
Biden chuan European ram pathum tena formal taka State of Palestine an pawmna an sawi chu a sawisel lek lek a, heng ram te hi United States te nena inzawmna nei tha tak te an ni.
“Ram tinin mahni pawm danah thuneihna an nei vek a, mahse US chu a dinnaah a chiang a ni” tiin Sullivan chuan a sawi bawk.
European ram pathum tena Palestinian state an pawm thu an sawi hnuah Israel chu a lungawi lo hle a, heng rama a ambassador te a kohhaw nghal vek bawk a. Ram pathum te chu ‘firfiakna lawmman pe’ ah a puh bawk.
Far-right Israeli Finance Minister Bezalel Smotrich chuan Netanyahu hnenah ram pathumte chhanletna siam ngei a duhthu sawiin chung zingah chuan Norway in Palestinian Authority te tana fund pek a tum tihbahlah ni se a ti bawk.
Kum 1990 chhova Norway hmalaknaa inremna angin Israel chuan palestinian Authority tan sum a lakhawm thin a, chu chu West Bank a inrelbawl nana hman thin a ni. Mahse, nikum 7 October a Hamas tena Israel an beih hnuah fund a pe zui duh tawh lo.
Mahse Sullivan chuan chung fund te chu Palestinian Authority te hnenah pekzui zel tur tia sawiin Biden administration chuan Gaza a Hamas tena thuneihna an chan chu Palestinian Authority ten chang leh zawk se an duh a ni.
“Fund pek hrek a nih chuan West Bank ah harsatna nasa zawk a siam dawn a, chuvangin strategy fuh lo tak a ni” tiin Sullivan chuan a sawi a.
“Palestinian mipui tena security leh hnianghnarna an neih theihna tur leh Israel tan pawha tha chu a tikhawbaw thei lo. Chuvangin mipui pawisawi lo tena nitin mamawh phuhrukna tur an neih theihna tur fund pek zuiloh chu a dik lo” tiin Sullivan chuan a sawi.
Tun hnaiah Biden leh Secretary of State Antony Blinken te chuan Palestinian state a pian theih nan hma an la a, chumi tur chuan Saudi Arabia chu remchangah hmangin Israel nena inthianthatna thukzawk a awm theih nan chet an la a ni.
Mahse Washington chuan tun hnaiah UN Security Council in State of Palestine pian theih nana ruahmanna a siam chu duh lovin a veto hmak thung a, inbiak remna ang leh Israel security interest khawih pawi lova kalpui tur a ni a ti hmak thung.