UK chuan July 4 ah parliament inthlan a hmachhawn ang tiin Prime Minster Rishi Sunak chuan a puang a, UK-ah Conservative te chuan kum 14 lawi chhum lo chat lova thuneihna chang tawhin Prime Minister pawh panga lai an awm hman a ni.
Inflation in kum thum chhunga a hniam ber lai a tawn mek laiin Sunak chuan No. 10 Downing Street atangin inthlan hun tur a puang zui ta a ni.
“Economic nghelnghet a awm theih nan office luahin hma ka la a ni” tiin Sunak chuan tun hnaia inflation number tlahniam leh GDP growth figure sang chungchang a sawi a. “Hei hi kan ruahmanna leh ngai pawimawh te a hlawhtlin zia lanna a ni” tiin a sawi bawk.
Kum 44 a upa Indian chhuak banker ni thin chuan British mipui te chu khawvel zauzawk thlir chung leh ruahmanna tha awm chhunzawm zel a nih theih nana rilru seng turin a ngen a.
“Cold war hnua khawvelin hun hlauhawm ber lai a tawn mek laiin inthlan kan hmachhawn dawn a ni” tiin a sawi a. Russia in Ukraine a run avanga energy man sang te, Chiuna nena technology lama inelna sang tak awm te, Uk in migration lama harsatna a tawh mek te, West Asia buaina leh islamist extremism chungchang te chu khawvel huapa harsatna nasa zawk thlen zual zel thei tiin a sawi bawk.
“Heng harstana awm mek te hi extremist kan values te engahmah ngai lo leh society phindarh tum ten remchangah an la a ni” tiin a sawi bawk.
Sunak chuan Labour party te chu plan nei lovah puhin, “chuvangin hmlam hun chu anni nen chuan a chiang lo” tiin Labour leader keir Starmer chu a sawisel bawk a.
Labour party te chu Torries te aiin opinion poll ah an sang mek thung a, Starmer pawh Sunak aiin poll lakah a sang zawk rih bawk.
July 4-ah UK inthlang thut dawn
Get real time updates directly on you device, subscribe now.
Prev Post