Masihi Sangati thawktute intuaithar

Synod Mission Board buatsaih, hnamdang (Vai) te hnena chanchintha hril hna thawhna – Masihi Sangati hnuaia thawktute tana intuaitharna chu May 24 (Zirtawpni) atanga tan khan Presbyterian Kohhran biak in College Veng Aizawlah neih a ni a, Pathianni zan thleng neih a ni.
Masihi Sangati hnathawkte intuaitharnaah hian Rev Dr Vanlalbela leh Shalom Vanlalmawii te chuan thupui thlan bik hmangin zirtirna an pe a. Zirtawpni zanah thupui zir inkhawm buatsaih niin, Inrinni nilengin thupui zir inkhawm hun hman leh a ni. Zanah vantlang Pathian biak inkhawm a awm a, Synod statistician Rev H Laltlantlanga’n thuchah a sawi.
Pathianni chawhma, chawhnu leh zanah vantlang Pathian biak inkhawm a awm leh a. Chawhmaah Synod executive secretary i/c Mission Rev Dr K Lallawmzuala, chawhnuah Mission Board secretary Rev R Lalhmingsanga, zanah Masihi Sangati Kendra director Rev R Lalrinsanga ten thuchah an sawi a ni.
He hun hmang hian Mizoram hmun hrang hrang leh Shillong atangin thawktute an kalkhawm a, Masihi Sangati hnuaiah hian thawktu 214 an awm mek.