Retailer-te lawmman tihpun kan tum – Supply minister

Retailer-te dinhmun ennawn a, an lawmman tihpun tum a ni a; buhfai buk dik zawka an hralh theihna tura ruahmanna siam a ni tih Supply minister B Lalchhanzova chuan a sawi.
Thawhtannia an party office-a inkhawmah ZPM hruaitu, FCS&CA minister B Lalchhanzova chuan dinhmun harsaten an chanvo an chan theihna turin ration card ennawn hna thawh zel a ni a, mipuiin buk tling leh dik taka buhfai an khul theihna turin ruahmanna siam a ni tih a sawi.
“Kum 5 kalta chhung khan hriat theih chinah tender hmanga buhfai lei a awm ngai loa, mipui mamawh aia tam buhfai phurh luhte a awm thin. ZPM sawrkar hnuaiah erawh buhfai lei dan phung siamthat a ni a, a sem danah pawh dik zawka kalpui tura ruahman niin, retailer-te dinhmun ennawn a, an lawmman tihpun tum a ni. Buhfai buk dik zawka an hralh theihna turin ruahmanna siam a ni,” a ti.
Retailer-te buhfai sem bâng hralh an remtih tak loh avangin a lo berah kum khatah buhfai quintal 80000 vel, a sumfai zawngin cheng vaibelchhe 70 vel hum theih an inbeisei thu te, Zo buh thar (buhhum) lei an tum thu te FCS&CA minister hian a sawi. Mualkhang Bottling Plant tharthawh leh tura hma lak mek a nih thu leh oil depot nei thuai tura hma lak a nih thu a sawi bawk.
Tunhnaiah, a bikin MNF party worker thenkhatten ZPM sawrkar hnuaia hnathawh felhlel tam tak awm anga an rawn pho chhuah thin chu mipuiin lo zirchiang hmasa thin se an duh hle tih B Lalchhanzova hian a sawi a ni.