Cyclone Remal vangin 30 chuang thi Nunna chan nuai 4 theuhin ral dawn

Cyclone Remal siper dawngtu Mizoramah May 27 atang khan thli leh ruah a thawk a, lei tawlhin chenna in a hnawl avangin nunna chan 30 chuang awmin hliam an awm bawk a, in 40 chuang leimin hnawl leh thliin a hawk a awm bakah luah ngam loh engemawzat a awm a, in luah zui ngam loh avang hian chhungkaw 100 chuang an inthiarchhuak.He chanchin buatsaih lai, May 28 zan dar 6.30 thleng khan hriat theih chinah Melthumah nunna chan 24 (chhungkaw khat mi 7 mi 6 awmna leh mi 3 dang awmna an tel) vel an awm a, heng zinga 14 hi lakchhuah tawh an ni. Ruang hmuh tawh zingah hian helai hmuna camp siama hna thawk hnamdang 4 an awm a, an thiante engzat nge hmuh la ni lo tih hriat theih a la ni lo. Melthuma in hnawl atang hian mi pahnih chu nung dama lakchhuah an ni.
Hlimenah nunna chan 6 an awm a, 3 lakchhuah tawh an ni. Lakchhuah tawh zingah hian hnamdang pakhat a tel a, la lakchhuah theih lohte hi hnamdang vek nia hriat an ni.
Salem Vengah nunna chan 3 (chhungkua) an awm a, pakhat lakchhuah tawh a ni. Aibawkah nunna chan 2 (nupa) an awm a, an ruang lakchhuah tum mek a ni. Falkawnah nunna chan pahnih (nufa) an awm a, pakhat lakchhuah tawh a ni. Lungseiah 1 thi a awm a, a ruang hmuh nghal a ni. Lungseia nunna chan hi Maubawk Aizawl ami a ni a, Samlukhai bul Lungseiah hian lo neiin a riahchilh a, thlam chhak minin a hnawl ta a ni.
Chiang taka hriat theih la ni lo mah se, he chhiatna avanga nunna chan hi mi 38 aia tlem lo an ni a, an zinga 20 hi chu an ruang hmuh leh lak tawh a ni. Lei tawlh hian lirthei thahnem tak a tichhe bawk.
Aizawl district tih loh, Mizoram hmun dangah thliin an inchung a hawk, leiminin in a hnawl leh chhiatna dangte thleng mah se, nunna chan an awm hriat a ni lo.
Chief minister Lalduhoma chuan Cyclone Remal avanga Mizorama chhiat tawkte tan zangnadawmna cheng vaibelchhe 15 pek chhuah tur ruahman a ni tih a sawi a. Nunna chan chhungte hnenah ralna cheng nuai 4 theuh hlan tura ruahman niin, a hmahruai atan nuai hnih hlan nghal an ni anga, a bak hi chhiatna report engkim felfai taka neih a nih hnu ah pek leh a ni ang. State pawn mi hnamdang nunna chante chu thil tul tih ngai tihfel a nih hunah an chhungte hnenah bank account lama thunsak a ni dawn tih a sawi a ni.
Ruahsur hian Mizoram hmun hrang hrangah leimin siamin, kawngpui a hnawh nasa a; thli tlehin thing leh electric ban a tihtluk, electric hrui a tihchhiat a tam a, chenna in, biak in, kohhran hmunhma leh sawrkar office leh quarters in chung a hawksak engemawzat a awm bawk.