AIDS vanga thite pual hun hmang Mizoramah AIDS thihpui mi 5021

AIDS vanga thite sunna atan May 30 hian International AIDS Candlelight Memorial Service hman thin a ni a. Mizoramah pawh hman a ni.
Positive Women Network Mizoram (PWNM) in Aizawla an buatsaih hmanpuitu chief minister Lalduhoma chuan, HIV kai mek zingah tam takin tha takin an damdawi – ART an lak laiin a, la rih lo kan la nei nual a, chhui zui hleihtheih loha awm pawh an awm tih a sawi a. ART lak ngei chu HIV enkawl nana thil tha ber a nih avangin pan hram se an duh ber tih a sawi a ni.
Candlelight Memorial Service chu AIDS vanga mual liam tawhte kan hriatrengna leh he natna a darh zel lohna tura thawktute chawimawina ni, infuih tharna ni a ni, tiin, “Bati hi midangten enna an hmuh theih nan a inchhi ral thin. Keini pawh bati ang hian midangten malsawmna an awn theih nan kan inchhi ral ve anga, he natna lak ata mite an lo him theih nan leh a lo kai palhte pawhin enkawlna tha an dawn theih nan bei zel ang u,” a ti.
He inkhawmah hian Aizawla kohhran hrang hrang hmeichhe pawl aiawh an tel a. Infuihna, tawngtairual, hriatrengna pual bati chhitna hunte buatsaih a ni.
Mizoram State AIDS Control Society chhinchhiah danin, Mizoramah HIV kai 24864 hmuhchhuah an ni tawh a, AIDS thihpui 5021 an awm tawh. Mizoramah ART Centre 14 a awm a, district hospital zawng zawng bakah ZMC, Kulikawn Hospital leh Synod Hospital Durtlang ah te a ni.