Sava hmul hralh to record siam

New Zealand-ah sava hmul pakhat an lilam a, he sava hmul hi dollar 28,417 (Rs 23,62,700 vel)-in an hralh! He sava hmul hian danglamna tak a nei hran lo a, an ngaihhlutna chhan pakhat chu hetiang sava hi hmuh tur awm tawh lo a ngaih, huia bird an tih ang chi hmul niin, khawvela sava hmul hralh to ber record a siam.
Webb’s Auction House-in he sava hmul hi an lilam a, an lilam hma chuan dollar 1,800 vela hralh theih an inbeisei a, mahse, beisei aia toin an hralh thei ta a ni. A hmaa khawvela sava hmul hralh to ber record chu huia sava hmul tho niin, 2010 khan dollar 5,150 (Rs 4,28,200 vel) in an hralh a, he record hi a rawn khum chiang hle a ni.
Huia sava hi Maori hoin an serh leh sangah an ngaihluin, an lal leh chhungkaw hotu leh mi awm thei deuh ten an lu-ah an tawn thin a. Huia sava hi mang tawha ngaih an ni a, khawvela hetiang sava an hmuh report hnuhnung ber chu 1907 daih tawh kha a ni.