Check gate enkawl zel rih rel

Khawzawl Tuisenphai check gate kalpui zel dan tur ngaihtuahin Thawhtanni khan district bawrhsap K Lalrohlua hoin a kaihhnawih sawrkar thuneitute leh khawtlang hruaitute an thukhawm.
Bawrhsap chuan Tuisenphai check gate siam leh kalpui a lo nih tawh dan a sawifiah a. Covid, kuhva ro tawlhruk leh African Swine Fever venna turin 2020 October 6 khan Home department atangin ‘temporary check gate’ din tura phalna hmuh a ni a. Temporary check gate a nih angin a enkawl zui leh kalpui zel dan tur ngaihtuah a tul ta tih a sawi a ni.
Khawzawl SP Lalchhuanthanga chuan check gate kalpui dan a sawi a. Tuisenphai check gate chu dan loa kuhva tawlhruk venna kawnga Mizoram sawrkarin check gate pathum – Kanhmun, Sairang Sihhmui leh Khawzawl a siam zing ami niin, check gate enkawlna kawnga Khawzawl District Executive Force (DEF) hmalakna leh harsatna tawh a sawi a ni.
Sawrkar official leh khawtlang hruaitute chuan Khawzawl Tuisenphai check gate chu dan phal loh thil tih tim leh tih tlemna kawngah a tangkai hle tih an sawi a. Check gate chu mipui pawhin an thlamuanpui a, CCTV nena thuam thlap a nih avangin dan loa thil tawlhruk tum ten gate an helna lamah police-te tan chan khan hriat a awlsam phah hle tih an sawi a ni.
Khawzawl Police hian June 1 zing khan Sialhawkah truck pasarih atangin kuhva ro bag 1150, cheng nuai 186 hu an man a, hemi zan vek hian truck pathum atangin kuhva ro bag 370, cheng nuai 74 hu an man bawk. May 21 khan Khawzawl Chhumliamkawnah truck pasarih atangin kuhva ro bag 857, cheng nuai 171.4 hu an man a ni.
Thukhawm chuan Khawzawl Tuisenphai check gate chu Khawzawl DEF (Police) in enkawl zui rih phawt se, changtlung zawk leh mumal zawka a kal theih nan hma lak zel ni se tiin an rel.