ZPM laka mipuiin an beiseina hrereng a, ram tan hmalam pana kal zel a tul tih ZPM hruaitu Lalnghinglova Hmar chuan a sawi.
Thawhtannia ZPM office-a inkhawmah minister Lalnghinglova Hmar chuan, sawrkarna an chan tirh atangin sawrkar kalphunga thil pawimawh zawm ngaite zawmin hun an hmang nasa a, Assembly Budget zawh a nih hnu lawkah MP inthlanin a zui a, vawiin thlengin model code of conduct-in min la phuar a. Hnathawh nana hun an neih tlem ngaihtuahin hna tam tak an thawk tawh tih a sawi.
Congress leh MNF sawrkarin ram tan thil tha tam tak an lo tih tawh rualin, rualawhna leh thil thar beiseinain mipui rilru ah kalphung thar mipui sawrkar- ZPM party a lo lang a. Mipuiin ZPM sawrkarah beisei an nei sang hle tih a sawi. “Min enchhin mai niloin min enchik hle a, kan ke pen tin hi beiseina nen min thlir a, vawi leh khata ram kalphung thlak hlawk thei ang hialin min ngai. Chuvangin mipui beiseina hi kan hriatreng a ngai a, kan ram tan hmalam pana kan kal zel a tul hle a ni,” a ti.
Ruling party an ni ve tawh tih hriat a ngai tih ZPM hruaitu hian a sawi bawk. “Ruling party reng reng chuan beih an tawk nasa thin. Chutiang chu kan dinhmun a ni chho zel dawn a, sawiselna zawng zawng chhanlet a tul ber loa, tawng hun a awm a, ngawih hun a awm. Puitling takin ruling party kan ni tih hriaa kan awm thiam a ngai,” a ti. Tunhmain rorelna chelhtu party worker zingah sawrkar hnathawk vau duh tawkte an awm nia sawi thin a ni, tiin, ZPM chuan nun zemawi chawinungin, ruling party nih thiam a ngai tih a sawi.
Politician-ten politics an luhchilh chhan a inang lo hlawm viau tih Lalnghinglova hian sawiin, “Mahni hamhai nan ringawt politics-a lut a awm thei a, chutiang mite chu ram thanmawhbawk an ni fo. ZPM chu kan insawi angin kan danglam bik tur a ni a, kan politics luh chhan hi ram hmangaih vang a ni tur a ni,” a ti.
June 13 & 14 hian sport khawmpui lian – Mizoram National Sport Conclave buatsaih an tum tih Sports minister hian a sawi a. Indian sport federation hrang hranga hruaitute an sawm tih a sawi a ni.
Mipui beiseina hriatreng a ngai – Lalnghinglova Hmar
Get real time updates directly on you device, subscribe now.
Prev Post