Box office-ah ‘Garfield’ a No.1

Tun weekend kalta khan North America-ah cinema hall sum chevelin pun lam a la pan thei chuang lova, nikum tun ang nena khaikhinin sum che vel hi 69%-in a tlem zawk. Hetiang boruak a awm lai hian ‘The Garfield Movie’ chu box office No.1 a ni.
North American box office ranking hi kartawp, Zirtawpni atanga Pathianni thlenga North America-a cinema hall hrang hrang-a film an tihchhuak te ticket an hralh that dan atanga tehin an siam thin a, The Garfield Movie hian tun weekend kalta khan cinema hall ticket hralhna atangin dollar maktaduai 14 lalutin box office No.1 a ni.
‘Garfield’ hian kar hnih chungin US-ah dollar maktaduai 51.6 a lalut tling tawh a, US pawna a lakluh nen chuan dollar maktaduai 152.2 a tling tawh bawk. He film hi dollar maktaduai 60 senga siam a ni.
Ryan Reynolds canna ‘IF’ pawhin a weekend vawi thumnaah dollar maktaduai 10.8 lalut lehin No.2 a la ni a, he film hian US-ah dollar maktaduai 80.4 lalut tawhin, US pawna a lakluh nen chuan dollar maktaduai 138 a tling ve tawh.
Dollar maktaduai 168 senga siam, ‘Furiosa: A Mad Max Saga’-in dollar maktaduai 10.75 lalut lehin No.3-ah a tawlh ta a, kar hnih chhungin US-ah dollar maktaduai 49.7 leh US pawnah dollar maktaduai 64.7 lalut tawhin, a vaiin dollar maktaduai 114.4 a lalut tling ve taw bawk.
‘The Kingdom of the Planet of the Apes’-in dollar maktaduai 8.8 lalut lehin No.4 a ni a, he film hian kar nga chhungin khawvel huapin dollar maktaduai 337.1 a lalut tling tawh a, tun nipui chhunga film tlangzarhah chuan sum lalut hnem ber a la ni.
North American Box Office Top 10:
1 The Garfield Movie $14,000,000
2 IF $10,800,000
3 Furiosa: A Mad Max Saga $10,750,000
4 Kingdom of the Planet of the Apes $8,800,000
5 The Fall Guy $4,200,000
6 The Strangers: Chapter 1 $3,600,000
7 Haikyu!! The Dumpster Battle $3,500,000
8 In a Violent Nature $2,119,000
9 Ezra $1,183,581
10 Sight $1,084,918