Bishnoi gang-in Salman Khan thah an tum dan police-in hrechhuak

Navi Mumbai Police te chuan Bishnoi gang-in Bollywood actor Salman Khan thah tuma an ruahhmanna te an hrechhuak thar leh ta a, Bishnoi gang hian Pakistani ralthuam tawlhru thin hnen atanga ralthuam hmangin Khan hi a car-a a tlan lai lo ambush an tumna leh Khan-a Panvel farmhouse beih an tum dan te an hrechhuak niin Times of India chuan a tarlang.
Lawrence Bishnoi leh a cousin Anmol bakah an thawhpui Goldie Brar te chuan AK-47 leh M-16 bakah ralthuam dang eng emaw zat he ralthuam tawlhru thin hnen atang hian an dawng niin an tarlang bawk. Police te chuan Bishnoi gang nena inkungkaihna nei mi pali- Dhananjay Tapesingh, Gaurav Bhatia, Vaspi Khan leh Rizwan Khan te tu an zawhfiahna atangin Salman Khan thah tumna plan hi an hrechhuak a ni. Police te hian Lawrence Bishnoi leh Goldie Brar gang member Deepak Hawasingh Gogalia aka Johny Walmiki te pawh an lo man tawh bawk a ni.
Salman Khan venhimna pawh an uluk lehzual tawh a, Khan hi a chetvelnaah pawh a bulletproof SUV-ah hlir a chuang a, Y+ security team leh police rual khatin an zui zel bawk. Hetianga a venhimna an tihchhah lehzual hnua a vawi khat nan Khan hi mipui hmuh turin niminpiah khan a inlan zuai a, Mumbai airport-ah hmuh a ni a, security ten an din hual vek a, paparazzi te pawh be lumlam lovin airport atanga a chhuak chu car-ah a lut tlang nghal a ni.