Paris Olympic-a Bopanna kawppui tura rin Balaji

World number four Rohan Bopanna leh N. Sriram Balaji chu kumin Paris Olympics-ah hian an inkawp hmel a, All India Tennis Association (AITA) lam pawhin Bopanna duhdan hi an hnial a rinawm loh.
Kum 44-a upa Bopanna hian AITA leh TOPS hnenah mail kaltlangin a kawppui duh hi a hriattir a, national federation lam pawhin hei hi an nemnghet tawh.
Balaji leh a Mexican partner MA Reyes-Varela Martinez tangdun hian Thawhtanni khan Bopanna leh Australian Matthew Ebden inkawp chu French Open men’s doubles third round-ah hmachhawnin an chak lo a, mahse, Bopanna chuan Balaji khelh dan leh chevel a hmuhin Paris tournament liana kawppui atan a it ta riau a, a duhdan hi ziakin federation leh Olympic-a tel tur sum leh paia vurtu sawrkar hnuaia din TOPS lakah a thlen ta a ni.
Balaji hian third round match-ah khan baseline atangin a khel tha hle a, Bopanna mitah Coimbatore tlangval hi a mawi riau a, a hnuhnungber atan thla thara Olympic medal a beisei lehna tur kawngah tandunpui atan a hual nghet ta a ni.
Indian player zinga Grand Slam title la thei pathumna Bopanna hian Rio Games-ah khan medal a hnaih hman hle a, Sania Mirza nen inkawpin mixed doubles bronze match an khel a, Czech combination Radek Stepanek leh Lucie Hradecka an ngam ta lo a nih kha.
Paris khuaa a cham mekna hmun atangin Bopanna hian AITA hnenah Olympic-a a kawppui tur chungchanga a duhdan a thlen tih sawiin, AITA Secretary General Anil Dhupar pawhin Bopanna leh mipa double world number 84 Balaji-te Paris Olympics-a an inkawp hnialna a neih loh thu a sawi.
Dhupar chuan, “Rohan hian ziakin Balaji nena inkawp a duh thu min rawn hriattir tawh a; Balaji hi player tha a ni ve reng reng a, Pakistan ramah pawh khan a khel tha a, French Open kal mekah pawh khan a chechhe lo. Big server a ni a, Rohan hian tandunpuia a duh a nih phawt chuan keini lamin harsatna kan siam lo ang,” a ti.
Olympic-a tennis player tel tur thlangtu selection panel hotu lu ber Davis Cupper hlui Nandan Bal pawhin Bopanna duhdan an thlawp thu a sawi ve tawh bawk.
Selection panel member dangte chu Davis Cupper ve bawk Balram Singh, Mustafa Ghouse leh Sai Jailakshmi-te an ni.