India in Pakistan an hneh hram

T20 World Cup khelh mekah Pathianni zan khan India leh Pakistan an inhmachhawn a, run siam tam thei lo India in harsa takin hnehna an chang thei hram.
New York khawpuia inkhelah India in an vaw hmasa a, an chetha lo hle. India hian Over 19-ah run 119 chiah siamin an out vek. Run 119 hi Pakistan tan umphak har lo tura ngaih a ni a, India hi Pakistan lakah tlawm ngei tura ngaih an ni. India tana run siam hnem ber Rishabh Pant chuan run 42 chiah a siam.
Pakistan vuak hun a thleng a, beisei angin run an siam tam thei bik lo. India ball vawmtute an chetha tlang a, an khingpuite run an pe tam duh lo. Run siam pup pup lo mah se Pakistan hian an target an hnaih hret hret a, over hnuhnung berah 18 siam an la ngai. India hneh thei dinhmunah ding bawk mah se Pakistan hian over hnuhnung berah run 10 chiah an siam thei a, an khingpuite umphak zo lovin an tlawm zui ta a ni.
Harsa taka Pakistan an hneh tum hian India bowler Jasprit Bumrah chuan wicket thum la in, run 13 chiah a pe a, man of the match-ah thlan a ni. Vanneihthlak taka an chak leh tak hlauh vangin India in Pakistan lakah record an nei tha chhunzawm zel. T20 World Cup-a an intum hnuhnung pakuaah India hian vawi sarih ngawt Pakistan hi an hneh a. Vawi khat chiah an tlawm a, vawi khat dang chu result a awm lo.