Zirna lama thawhdun dan tur inhrilh

Central YMA leh Samagra Shiksha Mizoram-in zirna hmasawnna atana thawhhona thuthlung (MoU) an ziah tawh angin, Mamit district-ah pawh vidyanjali (school volunteer programme) chungchangah Thawhlehni khan District Level Orientation Programme neih a ni.
DEO/DPC Mamit Laldingliana, Sub Hqrs. YMA Mamit president Vanlalchhuanga Chhangte bakah secretary H Lalnunfela ten thu an sawi a. State level-a YMA leh Samagra Shiksha thawhhona chu theihtawpa tihhlawhtlin zel an tum thu leh khawtlang mipui nen zirna lama hma sawn tura tanrual a tul thu an sawi.
Vidyanjali hi school mamawh, a hmanrua (kind) emaw thil tihsak (service) hmang emawa vantlang/ mimal ten tha an thawhna tur programme a ni a. A hlawhtlin theihnan YMA leh Samagra Shiksha thawh dun dan tur duan lawk leh Vidyanjali portal hman dan tur chu a lem nen inhrilhfiah a ni.
Inhrilhfiahnaah hian Sub Hqrs.YMA hruaitute leh branch hrang hrang atangin mi 30 chuang an tel bakah online mode-in Mamit district-a YMA branch 42-in an lo chhim a ni.