Iran president thlan turah hardliner rualte vek thlang chhuak

Iran president thlanna neih turah Iran’s Guardian Council chuan candidate paruk a pawm fel ta a.
An vai hian Islamic hardliner vek niin Supreme Leader Ayatollah Ali Khamenei ngaihdan zawmtu te vek an ni.
Constitutional body chuan mi 80 lai 28 June a inthlanna neih turah a zir chiang phawt a, chung mite chu an sakhuana leh revolutionary credentials te a enfel hmasa phawt a.
Chumi hnuah President Ebrahim Raisi thla kalta lawka helicopter chetsualna avanga nunna chan thlaktu tur hardliners te a thlang chhuak leh ta a ni.
Front-runner pakhat Saeed Jalili chu Supreme National Security Council secretary hlui niin nculear negotiator a ni bawk a, Ayatollah Khamenei duhsak ber nia sawi a ni.
Iran nuclear negotiating team head a nih laiin Jalili hian Iran-in nuclear programme a kalpuiah khawvel ram thiltithei pangate nena inbiakna an neihah nghet takin Iran dinna a dinpui tlat a ni. Hard-line Islamist ideologue niin executive experience nei lo a ni thung.
Tuna Speaker of Parliament ni mek Mohammad Baqer Qalibaf chu candidate zinga tling thei tura ngaih a ni bawk a. Revolutionary Guards general hlui niin Iran police chief leh Tehran mayor pawh lo ni tawh a ni bawk.
Candidate dang pathum Tehran mayor Alireza Zakani, Vice-President Amirhossein Qazizadeh Hashemi leh Mostafa Pourmohammadi te pawh hardliner vek an ni bawk.
Pourmohammadi hi justice leh interior minister hlui niin Ebrahim Raisi nen khan kum 1980 chhova political prisoner sang chuangte tihhlumtu ‘Death Committee’ an tih mai member a ni bawk.
Hardliner dang Massoud Pezeshkian chu Tabriz parliament member ni mek niin vote tla a chhiat viau chuan tling thei tura ngaih a ni chauh thung.
Pezeshkian hi Azeri hnam niin north-east Iran ah vote a hmu tha tura ngaih niin Turkish tawng hmang Azeris te tamna a ni a, hardliner vote duh lo te pawhin an vote ber tura ngaih a ni bawk.
Langsar tak pahnih candidate an nih remtihsak loh te chu president hlui Mahmoud Ahmadinejad leh parliament speaker tum thum ni tawh Ali Larijani te an ni.
Heng mite pahnih candidate an remtih loh hian chiang takin tun inthlanah hian Supreme Leader Khamenei-an a thawhpui theih tura a ngaih te chauh candidate pawmsak an nihzia a tilang anga ngaih a ni.
Candidate-ah duhthlan tur a tlem em avangin tun inthlan hian Iranians te-ah boruak a siam vak dawna ngaih a ni lo bawk a. Supreme Leader berin a hming maia inthlan buatsaihin a mi duh te chauh dah a tumna anga ngaih a ni.