G7 summit-ah Ukraine leh Gaza
Khawvel ram hausa intelkhawm G7 leader te chu tunkar hian Italy chhim lamah inhmukhawm dawnin Ukraine chung chang chu agenda bera an neih tur a ni.
US President Joe Biden, France president Emmanuel macron leh Japanese Prime Minister Fumio Kishida te chu Group of Seven leader inhmuhkhawmna luxury resort Borgo Egnazia, Pglia a June 13-15 summit neihnaah hian an tel dawn tih an tichiang tawh a.
Ukraine leh Gaza ah indona a thleng mek a, chutih laiin Biden, Macron leh Britain PM Rishi Sunak te chuan inthlan hmachhawn mai tur vek an ni bawk.
Khawvelin harsatna nasa tak a tawh mek laiin host Italian Prime Minister Georgia Meloni chuan non-G7 heads of government te pawh G7 summit-ah hian sawmin chung zingah chuan Turkey leader Recep Tayyip Erdogan leh India prime minister Narendra Modi pawh a tel a. Pope Francis pawh artificial intelligence chungchang sawi turin June 14-ah summit ah hian a tel ve bawk ang.
June 12 hian Ukrainian President Volodymyr Zelensky chuan Russia-in an ram a run chungchang sawihona neihah a tel dawn bawk a, chutah chuan Western allies te atanga tanpuina tam zawk a dil rin a ni.
G7 leader te chuan Russian central bank asset 300 billion euros an frozen-na atanga profit te chu Kyiv puih nan hian an pe dawn tia sawi a ni a.
Heng profit te chu $50 billion loan collateral atana hman tumna a awm tia sawi niin mahse tu in nge pechhuak ber ang tihah inhnialna a la awm tia sawi a ni bawk.
John Kirton, director of the University of Toronto’s G7 Research Group chuan inremna siam theih ngei a nih a beisei thu a sawi a.
G7 leader te chuan Russia military tihlen zelah China-in a thlawp dan pawh sawiho an tum bawk a. Summit hi official-in nithum tur niin Zirtawpniah a tawp ang.
Thla kua zet indona kalpui tawh Hamas-Israel war pawh sawiho a ni dawn a, G7 leader te chuan tun hnaia US-in remna awm theih nana rawtna a siam chu an thlawp bawk.
Indo-Pacific chungchang pawh sawiho a ni dawn a, heng bakah hian economic security te, green technology chungchanga China nena sumdawnna lama harstana awm te pawh sawiho a ni ang. Non-G7 guests te chuan June 14 ah ‘Outreach session’ zawm dawnin hetah hian Saudi Crown Prince Mohammed bin Salman, Erdogan leh Emirati President Sheikh Mohamed bin Zayed Al Nahyan te pawh an tel dawn bawk a. Argentina’s Javier Milei, UN Secretary General Antonio Guterres International Monetary Fund leh World Bank aiawhte pawh an tel ang.
Italian PM Meloni chuan migration leh Africa ram te nena inzawmna chungchang ngai pawimawhin summit-ah hian Kenya, Algeria leh African Union leader te a sawm bawk a. Climate change chungchangah chuan G7 ram te chuan April thla khan coal hmang power plant te chu kum 2030 hmaa nuai bo vek nise an lo ti tawh thung.