Naupang inchhawrah kan fihlim lo – MSCPCR

Danin a phal baka naupang kum tling lo inchhawrnaah Mizoram chu awm ve lo (nil) anga sawi reng thin ni mah se, kan fihlim bik loah an ngai tih naupang lam buaipuitu State Commission chuan an sawi a. Hetianga naupang chhawrtu chu dan hnuaiah chuan engti kawngah pawh a mawh latu tur a ni tih an sawi.
June 12 kha ‘World Day Againts Child Labour’ a ni a. Dik lo taka hna thawka naupang chhawrna ngaihven thar a, hemi ti reh tura tan tlan theih nana The International Labour Organisation-in khawvel puma hman tura a lo puan tawh a ni. Kumin thupuiah “Hna thawk tura naupang chhawr luih a bo na tura kan intiamna angin hma la ang u” tih hman a ni.
Aizawlah pawh District Legal Services Authority (DLSA) Aizawl leh Mizoram State Commission for Protection of Child Rights (MSCPCR) tangdun huaihawtin thuthar thehdarhtute nen hman a ni a. Hemi kaihhnawih dan hrang hrang zir ho a ni.
Naupang chhawr (child labour) tih hian, naupangin a theih ang ang hna a lo thawh ve ang kha a huam kher loa, danin a phal chin leh naupang taksa in a zawh tawk piahlama hna thawk tura chhawr, hursualna kaihhnawiha naupang inhnamhnawih tir leh ruihhlo tawlhna kawnga naupang inhnamhnawih tir chu a tinzawn leh do tlan ngai lai a ni tih an sawi.
‘Danin a phal chin leh naupang taksa in a zawh tawk piahlama hna thawk tura chhawr’ tihah hian dan chuan, naupang kum 14 la pumhlum lo te hmun him lo (stone quarry, halpuah siamna hmun adt) ang chia thawh a phal loa, a zawna darkar 4 leh a chanve aia rei chawl loa thawh tir a phal loa, zan dar 7 atanga zing dar 8 inkara hna thawh tir a phal lo bawk.
Kum 14 pel tawh kum tling lo te pawh, hmun him lo ang chia an thawh dawn chuan doctor hnen atangin fitness certificate an neihte a ngai tih an sawi a ni.
Mizoramah chuan, awmpuite, thingpui dawra thawk, quarry-a thawk, lirthei silnaa thawk, bawlhhlawh paihna hmun leh a dangte ah naupang kum tling lo thawk an awm thei nia ngaih a ni a. Hmun dang angin kum naupang lutuk inchhawr luih ang chu awm loin lang mah se, ‘child labour’ tih huanga fihlim vek anga sawi chi kan ni loa a lan thu MSCPCR hian sawiin, hemi zirchiang hian tun thla chhung Aizawl hmun hrang hrang an fang dawn tih an sawi a ni.
Zawhna chhangin, hlawh neia naupang chhawr chungchangah, vanduaina tawkin hliam emaw nunna hial emaw chan ta se, a chhawrtu (hlawh petu) chu dan hnuaiah chuan engkima mawh la tur, sum sen a ngaih pawha sengtu tur an ni tih an sawi a ni.