School naupangte chu zirlaibu chhung bakah a pawnlama thil pawimawh hrang hrang zirtir an tul a, chu kawng khat atan intodelh inzirtirna lam hawi chu high school-ah kalpui a nih thuai a beisei tih School Education minister Dr Vanlalthlana chuan a sawi.
Mizoram Government School Teachers’ Union (MIGOSTU) chuan Thawhlehni khan Aizawlah special conference an nei a. Hmanpuitu School Education minister chuan sawrkarin zirna a ngaihpawimawhin tan lak nasat a tum a. School Education department-a la thleng ngai lo thil thar hmuh chhoh zel a beisei tih a sawi.
Zirlaite syllabus an zirtir piahlamah zirlai laktlak, mi puitling, mahni kea ding theia chherchhuak tur leh nunphung tha leh system dik, life skills hrang hrang leh environment humhalh pawimawh zia zirtir uar turin zirtirtute chu a chah a. Chumi tihhlawhtlinna kawng atan ‘intodelh zirtirna’ pawh high school-ah kalpui a nih thuai a beisei tih a sawi.
MIGOSTU hi middle school, high school leh higher secondary school thahnem tak inzawmkhawmna a ni.
High school-ah intodelh zirtirna kalpui kan tum – Education minister
Get real time updates directly on you device, subscribe now.