Zoremi Hmar Zote
-- Advertisement --
Ina tawm chawrh chawrh, chhuak zen zen lo ka ni a, ka nuin zin turin min sawm deuh reng bawk nen, ka pu JC Chawngkhawliana Joute tlawh turin Manipur panin kan liam ta vuah vuah a.
Kalkawng:
Aizawl atanga Saitual thleng kawng a tha; a bak zawng chu ruah sur vanga diak/nâl em em niin, a then chu kawng biboh zet te, kopang lei min vanga motor pakhat leng tawk chauh te a ni hlawm. Kan chuanna Sumo, Sumo tawngtawl lam tawh lah chu a chhe sek mai a, Ngopa daiah rei fe kan ding a, chutiang zelin thlen hmain vawi thum vel kan chawl. A’n tlan te reng reng chu Telpui pem tur ang boh boha thâwm ngah a ni a, a chhungah chuan Bawrhsaiabe chi theh ila a to tuar thei ang tih tur khawpa tâwng tawh a ni. A khalhtu khan a thiam hrim a, kan rui êm lo hlauh.
Manipur thlen dawn hnaih kawng kha mitthlaah a châm; zàn a ni lehnghal; kawng a tê si, khuar a thûka kawng a bumboh nak alaiin kawng thlang lama khàm sâng zet te chu en pawh ka en tha ngam lo. Kawngtha han thlan tur bik awm lohna tih takah kan insawh ting awlh awlh a ni ber e…Aaaa…min thâp a ni mah zawk! Chaw ei chhung tih loh khawi khuaah mah chawl kawi lova Manipur tlang nghal kan nih avangin Aizawl atanga zing dar 7 vela chhuak kha, a tuk zing dar 3 ah Lamka chu kan thleng ta a, Ar ru che fuh lo VDP hlap hrep ang velin taksa a na!
Ni khatna:
Ka pu hi Rengkai lal niin, kum 90 a ni tawh a, inhmuh kan chak dun em em a, Motora min rawn hruaitirin a tawpah chuan kan inhmu ta. Min han hmu chu a lawmin a lung a awi hle tih a hmelah a lo lang a, tawng kan inchuh nghal nak mai. Zin tura min sawmna a rei tawh a, ka hman lawk thei lo zawk mai pawh a; ka pu chu a hun tam zawk khumah a hmang tawh na a, kan thlen tuka min len kualpuinaah pawh min la zui zak zak peih a, ka va lawm teh lul! Min lenkualpuinaah cuan Vishal (ka pu ta)te min fanpui a, ka chauh deuh avangin a ni khatna chu ka tumtawi ta mai. Tlaiah chuan chaw eia sawmtu kan nei a, Upa Ruala a ni. A motorin min rawn hruai a, chaw ei khamah min dah leh thlap a, pa namai lo tak, Awardee of National Award to Teachers ngat, tawng duh leh a bula awm nuam, viak tha leh ngainatawm tak a ni, a chungah kan lawm hle.
Ni hnihna:
Ka Manipur zin chu ‘lal’ hi ka ni hawt mai. Ka chhuah vah dawnin motor-in min rawn hruai thlap a, min dah leh a, hemi ni-a kan leng tur pawh hi motora min rawn hruai lehin, Lal fanu Ni Partei(Teressa-i) i’n min lenpui a, Motor khalh a hnehsawh dan chu pui tak a ni. Dil lian leh zau zet mai kamah lengin hun nuam tak kan hmang. Hmun pawimawh dang te min fan kualpuiin min hrilhfiah zel a, kan zo hnahthlak unaute in, Meitei-in an hal chhiat te min fanpui a, hmuh a hrehawm ka ti. Meiteiho in an halsak ve te pawh min hmuhpui a, hmuh a nuam chuang lo. Indo hian eng rah tha mah a chhuah lo va, mahni inhremna mai mai a ni e. Tlaiah chuan…aaa…zan a ni tawh mah zawk; a thiannu Monica Restaurant-ah min chawlhpui a, an thil siam a tui hle.
Ni thumna
Ka patea (Fawna)te nupain min len chhuahpui ve thung a, front line an tih mai, zohnahtlak unaute duty-na hmunah an chawhmeh tur sa te leiin kan va pe a, khua atangin km 3 vela hlâ a nih ka ring. Km chanve dan velah duty post hmun thumah an siam a, tlangval la naupang tak tak an ni nual mai. An duty-na hmun te, an riahna leh khawsakna hrim hrim chu hmun nuam tak a ni lem lo ngawt mai. An buk chhung velah te chuan tui a tling zeih zuih mai a, an mutna lah an muhil thei dawn em ni tih tur khawpa ruh leh pan a ni. Inkâpin thawm nei rih lo mah se an khawsakna hmun ringawt pawh mi nawlpuiina kan peih loh tur hlir a ni; Ram chhan Valbuang tang fan fan!
Meiteiho nena an ram inchuh te min kawhhmuh a, Meiteiho duty-na te min kawhhmuh bawk a. Hrehawm ber mai chu Mizo tlangval huaisen David |hiek lu an tanna hmun tlawh kha a ni. A thlaphan dan tur te, a mangan dan tur te ka ngaihtuah hian mittui a tla lo thei lo. Ram chhan nana nun hlantu David hian chawimawi a phu tak zet zet. U |ha-i (Lal monu) phei chuan kan va kal lai chuan a ruh them nawi te a la awm a ti! A rapthlakin sawi pawh a hrehawm ngawih ngawih mai.
Tlaiah chuan ka pu te inah chaw kan ei leh a, an eirawngbawltu ten an thiam hle a ni, thaw hle hle khawpa puarin kan han ei tak kha!
Phai tih takah a lum deuh e tih mai loh-ah chuan khawpui nuam tak a ni. Lirthei leh in leh lo tha pui pui a tam a, NH tih loh veng chhung kawng hrang hrang a chhe phihrit hle a, a khawthleng leh in sak dan ten a zir teh lul nen, siam thatah a itawm ngawt mai; kan cham chhungin two wheeler khalhtu helmet khum pakhat chiah ka hmu! Hmar tawng an hman ka hre hnem ber a, paite tawng leh thado tawng te pawh tawng tualleng chu a ni ve tho mai. A chengate khian khing tawng pathumte khi an hmang thei deuh vek a, ka hmang thei lo deuh vek thung. Hmar tawng hi chu an sawi ka hre thiam a, ka hmang ve thiam lo tih a ni deuh mai.
Kan cham chhung zawnga kal hah lova min siamtu Pu Ruala chungah te, ka pute chhungkaw chungah te ka lawm em em mai. Ni Partei leh U Khawltha-i te in ngaihawm a, ruah sur hnuaia Singzuo ei te kha a nawm teh kha le! Apu JC.Chawngkhawliana Joute pawh ka ngai. Khati taka min ngaihsak a, min buaipui a, min lo tuam hlawm kha phu lo kan inti tak zet a, an chungah kan lawm nawn awn awn e. Lo dam sela, kan dam ang a, hlim taka kan inhmuh leh thuai beisei ang.