SUPER CM KAN MAMAWH

Dr. C. Lalrampana

A KAMKÊUNA
Kum 2020 August thla khan India Today-in “Mood of the nation” survey a neihah Adityanath hi India rama chief minister che tha ber a ni tih a tarlang. Bharatiya Janata Party-a Yogi Adityanath hi March 19, 2017 atang khan UP chief minister ni mek a ni. India Today Mood of the Nation (MOTN) poll-ah a zawnin vawi 8 chhung chu ram puma zawhna chhangtute chuan chief minister 30 zingah Adityanath hi a tha ber niin an sawi. Tun hnaia survey an neihah erawh India rama CM lar ber list-ah hian Odisha Chief Minister Naveen Patnaik chu pakhatna a ni a, pahnihnaah hian Uttar Pradesh CM Yogi Adityanath a awm. Biju Janata Dal (BJD) aiawhtu Patnaik chuan popularity rating 52.7% hmuin pakhatna a hauh a, BJP atanga Yogi Adityanath chuan popularity rating 51.3% hmuin pahnihna a hauh bawk. Tripura Chief Minister Dr. Manik Saha chu Chief Minister-te zingah popularity rating-ah India ramah pangana a ni.
State CM 30 zingah hian Mizoram CM a lang pha ve emaw hriat a ni lo. A lang pha a nih pawhin a mawngphah lamah a awm pha ve mahna?
SUPER CM AWMZIA?
India Today-in “Mood of the nation” survey a neiha a teh dan atang hi chuan Super CM tehna (criteria) atan lârna (popularity) hi ni berin a lang. He tehfung hi a dik thawkhat viau rualin mahni ram awp chhunga mipuite hamthatna tur zawnga thawk tha ber thlir erawh chuan lâr ringawt chu super CM tehfung a tling thei lo. Super CM tling deuh ber tura ngaih theih chu Delhi UT Chief Minister Arvind Kejriwal AAP Sorkar hruaitu luber khu a ni. A chhan chu thil dik leh thaa a hriatah chuan huaisen takin thuneihna a kengtlang hmiah hmiah thei a, an Party high command lamin an khakin an sawisel ngai lo. Super CM hi Dictator nen a inang lo, mahse, ngaihfin awl tak a ni ve thei. Dictator chu political leader, thuneihna famkim nei a ni a. Dictatorship chu dictator pakhat emaw, pawl tenau emawin a awp state a ni. He thumal hi Roman Senate-in emergency huna republic rorel tura a thlan Roman dictator hming atanga lo chhuak a ni. Ram pakhat chunga thuneihna pumhlum nei, a tlangpuiin tharum hmanga thununna hmu tawh, mahni thu chauh duha roreltu (despot) a ni. Tin, tiduhdahtu (absolutist) emaw, totalitarian a ni thei bawk. Super CM erawh ‘Supreme authority’ duh duha thil chinfel theihna leh thuneihna nei mi. thulai latu (arbiter), mithiam. hriatna bik emaw theihna bik nei, thiam taka ti thin a ni ti ila a dik zawber awm e. Chutiang chu Zoramin a la nei ngai lo.
ZORAM SUPER CM
Tuna CM Pu Lalduhawma hi Kum 1985-a Anti-Defection Law of 1985 hmangin lawmaker atan vawi hnih disqualified a ni a. Tin, Congress leh Mizo National Front (MNF)-te aia Mizoram danglam dawrh tura a beihna chu vawi 4, kum 25 chhung zet a hlawhchhampui hnuah party 6 inzawmkhawmna Zoram People’s Movement (ZPM) Ministry CM a lo ni ta a ni. ZPM hian State-a Assembly seat 40 zinga 27-ah hnehna a chang a. Chief Minister’s Office hi Pu Lalduhawma tan chuan thil thar a ni lova, kum 1972-77 chhung khan Mizoram UT Chief Minister hmasa ber C. Chhunga principal assistant hna a thawk tawh a ni. IPS a tan lai khan Indira Gandhi-i security cover a enkawl a, IPS officer a nih laia Goa-a a thawh that avangin kum 1982 khan Prime Minister hlui Indira Gandhi venhimna hna hi a thawh theih phah a ni. Sorkar hna bansanin Congress a zawm a, kum 1984 May thla khan Mizoram Pradesh State president a ni a, thla 7 hnuah Mizorama Lok Sabha seat awmchhun atan Lok Sabha Member-ah thlan tlin a ni. Kum 25 a vahvaih chhung khan a policy ngai a dinpui ngar ngar a, tunah a hun ruat a lo thleng ve ta a ni. (Thuhriltu 3:1)
MAHSE NGATINGE?
Zoram mipuiin super CM dik tak ‘Supreme authority’ duh duha thil chinfel theihna thuneihna nei. thulai latu (arbiter), mithiam. hriatna bik emaw theihna bik nei,beisei taka kan lo thlir thup laiin, dikna duh; eiruk duh lo; ramri humhalh duh; intodelh duh; mi tha leh chhuanawm; ruihhlo do ngam kan CM ni lai hian ram siam that a tumna kawngah daltu lian tak (stumbling block-baadha) a nei lian tan ta hle niin a lang. Kolkata ballygunge hmuna Mizoram House hralh tawh a cancell ngam, Lengpui airport siamthat a ngam, tar pension lawmman tihpun, midday meal cook lawmman tihpun, ASHA lawmman tihpun, aikal tihtawp a ngam, zirtirtu lem 28 banna thupek hming ziak hnante a ngam a.
Sorkar hnathawk aikal la a titawp tak tak ngam mai thei bawk. Mahse, open tender, restricted tender, departmental work SASCI sum etc. a nih dan tur dik taka kalpui turin a duhdan thil dik leh tha, a nihdan tur kalpui thei lovin a huaisenna chuan a paltlang zo ta thin lo niin a lang. Pu Lalmanzuala’n “MNF; Congress; BJP leh ZPM-te hian tlin chiah an khel, an inang vek”a tih thin hi a dikna a lo lang tan ta. Kum chanve a vei dek dek a, super CM kalkawngah hling zum lian leh sei pui pui rah tur a awm tan ta fer fur mai niin a lang. A va’n lungchhiatthlak tehlul êm! Thiamna leh finna, mizia (personality) kawngah chuan tuna kan CM hian Arvind Kejriwal, Naveen Patnaik leh Yogi Adityanath-te a tluklohna a awm bik lo. Mahse, anniho angin ram leh mipui tana thil tha leh thil dik a ti ve tak tak thei dawn lo tih chiang takin a thawiin a lang thei ta.
A TLÂNGKAWMNA
ZPM Ministry hi political party 6 intelkhawmin an siam a nih avangin Super CM nei thei tura kan inngaih leh beisei mek hi che hlei thei lovin a kut phuar (handcuffs) a ni tan ta mek em ni? Super CM approve ngam loh khawpa thil dik lo leh tenawm ‘file veivak regreted’ chu kalnawntirleh niin thaw dep depin maimichhing chunga approved-leh hnuhnawh ngai file a awm nuk tan tawh nia sawi a awm. Kan CM hi dikna ngaina mi, a taka ram hmangaihtu a ni a, a duh ngai miah loh thil tenawm tak tak a khawih fo thin a ngai dawn ta niin a lang. A duhdan ang taka tha leh huaisen takin Supreme
Authority hmang lui ta se, CM atanga tla thut thei reng a nih hmel bawk si! A rukin a rilru a hah thin dan turzia ngaihtuah hian a khawngaihthlak takzet a ni. Delhi CM Arvind Kejriwal-te ang khuan thuneihna sang neiin khak buaia salbehtu awm ve lo ni ta se Super CM dik tak kan nei ve thei a ni mai tur a? Ministry hmasate ang tho khan party mi leh sate an inchâwm thau ve tan dawn ta em ni le? Tuna kan CM hian Super CM function a nihna tur ang takin kalpui lui ngam se chuan ZPM Manifesto an aupui dum dumte kha a takin a hlawhtling chho zel ang a, Zoram tan kâwl a eng ang a, khua a var mai tura aw! Mahse, a function dik tak a khawih thei bawk si lo a nih hmel? Mizoram State Project Monitoring Committee-te lah hian system monitor lovin work supervisor hna an thawk ta zawk emaw tih a awl hle. Tun lai tak phei chuan MSPM Committee Secretary hian ngaimawhtu leh hnawksak titu a ngah tan hle niin a lang. Mi tha leh mi dik a nih vang a ni ngei ang. Mipui sorkar pawhin mi dik a ngai thei lo tan ta em ni? Thuneitu sangah hekna ‘verbal complaint’ a lut zut zut reng niin thu thangva a awm mek. ZPM pawh a lêm chuang lo, ramhluizia tho an la zakkep a ni mai law’m ni? ZPM hian Zoram mipui hmaa an tiam thu zozaite kha an mangnghilh lui tan dawn ta em niang? Mipui beisei anga ram rorelna an kalpui chuan political party dang tan hmun a awm tawh kher lovang tih tur a nih laia a ngai bawka an kal leh a nih vaih erawh chuan ‘Bel keh phuarkhawm ang mai’ sorkar hian State Assembly term khat pawh hi an hmang tlingtla lo thei tlat? Engpawhnise, Super CM dik tak kan nei thei dawn em? ngun tak leh uluk takin i lo thlir rih phawt mai teh ang u.