Furpui leh tuiluankawr

Kum tin furpui kan hmachhawn thin a, furpui laia chhiatna hrang hrang a thlen thin dan pawh kan hmuin kan hria; furpui apianga sawi hlawh ziah chu tuiluankawr hi a ni.
Khaw tinin hmasawnna tur kan neih inang tlang chu tuiluankawr hi a ni awm e. A bikin, Aizawl khawpuiah, tuiluankawr a mumal loh avanga khawpui chhunga chhiatna hrang hrang thleng thin hi a tam ta hle. Furpui apiangin tuihawkin khawpui chhung kawngpui dung a zawh dul dul a, ruah sur zawh hnuah pawh luanchhuahna tur hre lo tuihawk kawngpuiah a li pem pum thin. Nasa taka ruah a sur miau hi chuan, tuiluankawr atanga tuihawk luangliam tawk chu a awm lo thei lo ang; hei hi chu tuiluankawr tha a awm na na na chuan kawngpuiah a chambang rei lo tura ngaih a ni. mahse, kan khawpui chhunga tuihawk luangte hi chu luanchhuahna tur tuiluankawr a awm mumal loh vang a ni tlangpui.
Khawpui enkawltu AMC a lo pian hnu lawk khan, khawpui chhunga tuiluankawr felfai tak a awm theihna tura hmalak kha hna hmasaa neih chu a ni ve ngei a, mahse beisei angin hmalakna a kal mar ta lova, tun hi kan thleng a. Khawi khawiah emaw chuan tuiluankawr tha tak tak chu siam thar a ni teh meuh mai, mahse tuiluankawrte hi a inluanpawh tawn kual that a pawimawh a, chu chu kan tun dinhmunah hi chuan duhthu a la sam lo em em a ni.
“Tuiluankawr tha kan neih a ngai a ni” kan ti kum tin a; mahse, tun thleng hian tuiluankawr tha kan la nei thei lo. Kan neihchhunte lah chu thal laia bawlhhlawh paih nana kan hman avangin bawlhhlawhin a hnawh khat a, tuihawk a luang tha thei lova, kawngpuiah bawlhhlawh a rawn inhawrh chhuak a, mihring chenna in chhungah tuihawk a luang lut chiam thin. Kum tin hetiang hi a thleng ziah a tih theih ang.
Kum tina harsatna kan tawh dan hre reng chung si hian, tuiluankawr tha kan la nei thei lo a, hetah hi chuan harhtharna kan mamawh viau mai. Tuiluankawr siam hi fur laia thawh chi a ni lo va, thal laia thawh chi a ni a; mahse, ‘laiking pawnpui tah tur’ kan iang reng mai niin a lang.
Furpui hi India ramah chuan June-September a ni deuh ber a; he thla li chhunga tuiluankawr that loh avanga kum tin tawrhna thleng thin hi kan hre bel viau, mahse kum hei leh chen hi tuiluankawr tha kan la nei thei der si lo. Khawpui enkawltute han tang sauh sauh teh se.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More