Monitoring Committee-in secretary thar nei ta

Sorkar tharin Mizoram State Project Monitoring Committee (MSPMC) a din a, tun hnaiah secretary nei chungin secretary thar tur an ruat. Secretary thar an banna thu hmuh tur a awm lo a, mahse secretary thar a awm a nih chuan a lo ni sa chu a ban a ngai. June ni 18 khan secretary tharin charge a la.
MSPMC secretary thar ruat chungchang hi David Sailo chungchang nena sawi zawmna a awm a, hei hian titi a siam zual niin a lang.
Sorkar tharin MSPMC a din khan secretary atan social media-a thawm ring tak, Ruata Sailo tia thil post thin, Er Vanlalruata Sailo an ruat a ni.
MSPMC hi January ni 22-a din a ni a, Ruata Sailo hi secretary a ni. Mahse June ni 14 khan secretary thar ruatna notification a chhuak a, Ruata Sailo hi ban ni lo mah se secretary post hi pakhat chauh a awm avangin Ruata Sailo chu secretary a ni zui thei lo.
Ruata Sailo thian hnai thenkhatte sawi danin, chief minister hian opposition an nih lai atangin Ruata Sailo hi David Sailo niin a ngai a, tu tu emaw pawh ‘David Sailo a ni ti raw’ tiin a zawt. A mi zawhah hian media mi pawh an tel.
Ruata Sailo hi secretary ni lova member nihtir tumna pawh a awm a, chutiang vel karah chuan secretary thar hi ruat a ni ta a ni tiin a thiante chuan an sawi.
Chief minister-in David Sailo emaw a ti em tih zawhna chhangin amah Ruata Sailo chuan, “Ka bulah chuan chutiang chu sawi a awm lo a, mahse ka thiante bulah chuan a sawi,” a ti. A hmain amah bantir tumna a awm em tia zawhna chhangin, “Ka hre lo a, mahse thiante bulah chuan ‘A bang dawn nge ka ban dawn?’ ti chuan a sawi a,” a ti bawk.
Secretary a nih chhungin hna 12 vel chu an ‘monitor’ hman a, hna lian tak tak tia sawiin, “Tihian pawn lam atangin kan monitor zui ang a, chhung lam atangin sorkarin a monitor bawk ang a, hna a sawt zawk ang,” a ti.
June ni 18 khan secretary thar hnenah Ruata Sailo hian charge a hlan.