Nato chief-in China-in hremna tawk se ti

Nato chief chuan Ukraine indonaa Russia a thlawp avangin China chuan hremna a tuar tur a ni tiin a sawi.
Jens Stoltenberg chuan Beijing chuan Russia indona thlawp tho chung siin chutihrualin European ram te nena inlaichinna kalpui tho siin chet a la tiin a sawi bawk a.
“Hetiang hian a kal reng theih loh” tiin Stoltenberg chuan Washington a tlawhnaah a sawi a ni.
Kar kalta tawp lam khan Switzerland a peace summit neihnaah khawvel ram hrang hrang aiawhte chuan Kyiv an thlawp thu an sawi a. Mahse, Russia chuan summit chu hun khawhralna mai mai tia sawiin Ukraine a tlawm a nih chauhin inremna lam hawia inbiakna an kalpui chauh dawn a ti a ni.
China-in Russia a thlawp tlat chungchangah Nato member ten hmalakna an nei dawn em tia zawhna chu Stoltenberg chuan hrek pawh an ni mai thei a, sawihona kan nei mek a ni a ti.
China chuan Russia nasa takin a pui tia sawiin ‘technology pawimawh tak tak micro-electronics te Russia missiles, weapons Ukraine laka a hman te a siam theihna tur a pe a ni’ tiin a sawi a.
“China hian a chet dan a thlak lo a nih chuan eng hunah emaw chuan economic lama hrekna kan kalpui mai ang” tiin Stoltenberg chuan a sawi bawk.
Beijing chu Russia a hrek avangin hrekna tlem a zawng tawk tawhsa niin thla kal ta khan US chuan China leh Hong Kong a inbun firm 20 vel chu a hrek tawh a ni.
China thung chuan Moscow nena an sumdawn tawnna chu chhan thungin ralthuam hlauhawm a pe lo a ti a ‘dual-use items te chauh chu pawh dan leh regulation mil thlapa insumdawntawnna a ni’ tiin a sawi ve thung.
Russia chu world stage ah kum 2022 a Ukraine a run hnuah nsa taka thlauhthlakin a awm tawh a. Putin thung chuan khawthlang ram te balance of power chu a inthlak danglam tia sawiin an rilru milpui te nen an thawkho zel dawn a ti thung.
“Russia hian authoritarian leader te a thawhpui zui ta zel a ni” tia sawiin Stoltenberg chuan Iran, Beijing leh North Korea te a lamchhuak bawk.
Stoltenberg chuan North Korea chuan Russia hnenah artillery shell a pek thu sawiin Russia chuan North Korea missile leh nuclear programme tan advanced technology a pe ve thung a ti bawk a.
“Russia-in Ukraine a beih meknaah North Korea chuan Russia a tanpui a ni” tiin Stoltenberg chuan a sawi.
Stoltenberg chaun Nato chuan nuclear warheads te Russia leh China inluling zelah tam zawk an dah belh mai thei a ti bawk a. Stoltenberg thusawi chu Kremlin thupuangtu Dmitry Peskov chuan boruak tisosang zualtu tiin a sawisel thung a.
Mahse Stoltenberg chuan Nato chu nuclear alliance a ni a, Nato member pakhatin beih a tawk a nih pawhin Nato ram tin ten an chhan ang a ti bawk a.
“Nato thiltum chu indo a ni lo, indona awm thei ven zawk a ni” tiin a sawi.