Shah hovin Manipur chungchang sawiho

Union Home Minister Amit Shah chuan Manipur buaina chung changah high-level meeting kovin Chief Minister N. Biren Singh tel lovin engtianga kalpui zel tur nge tih an rel.
Buaina tihtawp a nih theih nan lungruala chetlaka ngaih thu sawiin Shah chuan Union Ministry of Home Affairs (MHA) chuan Meitei leh Kuki-Zo te chu a hranpa ve vein an kawm dawn tiin a sawi bawk a.
Manipur Chief Minister Biren Singh chu he meeting-ah hian ‘security officials’ te chauh tih chhuanlam siamin sawm a ni ve lo nia sawi a ni bawk.
Manipur sorkar chuan thuchhuah siamin CM Biren Singh tel lohna chhan chu May 30, 2023 atang khan Kuldiep Singh, Security Adviser, Manipur Government chu Unified Command chairperson atana ruat tawh niin security kaihhnawih thilah chuan mawhphurhna latu a ni an ti thung.
Shah chuan Government of India chuan State sorkar chu security thilah a thlawp reng tiin a sawi bawk.
Meeting neih hma lawk hian Jiribam district-ah tharumthawhna thar chhuak lehin, meeting neih lai ngei pawhin vehicles za tel tehmeuh Imphal valley a bungrua phurtu te chu National Highway-37 ah danchahin an awm a, Kuki-Zo Village Volunteer te chuan kawngpui an dangchat a ni. Hetianga an tihna chhan hi sawiin Meitei community tena Kuki-Zo mitena NH-37 an hman theihloha siam tuma hma an lak chhanletna tiin an sawi.
MHA chuan thuchhuah a siamah Shah chuan security dinhmun thlirin officials te chu Manipur-ah thil duhawmlo a thlen zui tawh loh nana hma la turin a ti bawk a. Central forces Manipur a tirhluh chu tihpun tur a nih thu leh a tul a nih chuan boruak muanawm siam turin hmun pawimawh zualah dah an ni ang a ti bawk a. Tharum thawhna kalpui luite lakah hremna na tak lekkawh tur a ti bawk.
Meeting hian darkar khat awhin tuna Manipur dinhmun diktak chu thlirhona neih niin sorkar chuan channel hrang hrang atanga thulakna neiin ni reilote hnuah thutlukna a siam dawn tih a ni bawk.
BJP rorelna State-ah hian Kuki-Zo leh majority Meitei community te chu May 3, 2023 atang khan intibuai tawhin hei vang hian mi 50,000 chuangin an chenna in leh lo chhuahsanin mi 221 chuangin nunna an chanphah tawh bawk a. Police ralthuam 4,500 chuang rukchhuah niin heng zinga hmun thuma thena hmun khat chauh hmuh let a ni bawk a. Sum inthin leh mi ruk bo chu a bik takin Meitei chenna valley areas ah a nasa zual a. Kuki-Zo te chuan hill district tan seperate administration an ngiat bawk.
Home Minister Shah hova meeting neihah hian Security Adviser Kuldiep Singh; Director General of Police, Manipur, Rajiv Singh; Chief Secretary Vineet Joshi; Army Chief Manoj Pande; Army Chief-designate Lt. Gen. Upendra Dwivedi; GOC, 3 Corps, Lt. Gen. H.S. Sahi; Assam Rifles DG, Lt. Gen. Pradeep Chandran Nair; Adviser (NorthEast) A.K. Mishra; Union Home Secretary Ajay Kumar Bhalla; Intelligence Bureau chief Tapan Deka te an tel a ni.
Lok Sabha inthlan result puan hnuah Rashtriya Swayamsevak Sangh chief Mohan Bhagwat chuan June 10 khan Manipur a remna awm theih nan hmalak nasat ni se a ti a. “Manipur in kum 10 vel remna leh muanna a hmu a. Gul culture a bo tawh hman a. Mahse, tuna buaina mei tihreh nan hian tu nge ngaihtuahna seng? Remna leh muanna chu ngaih pawimawh ber tur a ni,” tiin a sawi.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More