Science hman tangkai lam sawi ho

Mizo Academy of Sciences (MIPGRASS tih thin) general body meeting vawi 25-na chu Zirtawpni khan Aizawlah neih a ni a. Hmasawnna ngelnghet nei tura science leh technology pawimawh zia sawi ho nghal a ni.
Hmanpuitu minister Prof. Lalnilawma chuan, hmasawnna ngelnghet tih tawngkam chu kan hmanna a rei tawh ang huin a taka hmuh tur enge awm tawh tih inenfiah a pawimawh tih a sawi a. Science-a hmasawnna chuan ram leh a mipui tan hmasawnna a keng tel tur a ni, tiin, “Hmasawnna reng reng ‘sustainable development’ anga kalpui a nih loh chuan awmzia a nei thui thei lo. Science thiamna hi a tha leh a chhe zawnga hman theih ve ve a nih laiin, Mizoramah chuan thil tha tihna atana hman a ni ber hi a lawmawm a ni,” a ti.
Keynote address petu Dr Aldrin Malsawmtluanga chuan, India-in zalenna a hmuh phat atang khan ram hruaitute chu nuclear leh space programme lamin a hneh a, science thiamna chu ram hmasawnna hnuk a ni tih an man hle tih a sawi. Kum 1976-a danpuia Fundamental Duties an belh Article 51A pawh khua leh tui zawng zawng tih tur chu nitin nun leh hmasawnna atana science hman tangkai lam a ni tih a sawi a. Sustainable Development Goals tum chu, khuarel thil tichhe loa mihring hmasawnna hna thawh a ni tih a sawi bawk.
Report-a lan danin tunah hian MAS member 502 an awm a. General body meeting thurel zingah Directorate of Science & Technology chu department puitlinga hlankai, Mizoram Science Research Database siam leh single use plastic hman khapna dan khauh zawk kenkawh chungchangte a tel.