Minister-in a sawi awm loh tak a sawi – MPCC treasurer

Minister Pi Lalrinpuii’n village council-te thawhpui an harsat vanga an term pawh hnaih tumna awm thu a sawi chu thil pawi tak, tunhmaa la awm ngai lo a ni tih Congress hruaitu Dr Lalmalsawma Nghaka chuan a sawi.
Zirtawpnia Congress Bhavan-a inkhawmah MPCC treasurer Dr Lalmalsawma Nghaka chuan, minister Pi Lalrinpuii’n local council leh VC-te thawhpui an harsat vanga an term pawh hnaih tumna awm thu a sawi chu thil pawi tak a ni, tiin, “Minister-in a sawi awm loh tak a ni. Hetiang hian tunhma in tu sawrkar mahin an la ti ngai lo. Mipui thlan an ni a, hetianga tih tum hi a pawi hle,’ a ti.
Central-a BJP sawrkarin sawisel an ngaithei lo em em a, anmahni sawiseltute thubuai siamsakin an nekchep thin a. Mizoramah chuan sawrkar kal tawhte khan social media-ah pawh sawiselna nasa tak an tawk thin a, an duh chuan khinglet ve thei mah se, an khinglet ngai lo tih MPCC hruaitu hian a sawi. ZPM kaihhruai sawrkar chuan insawisel an ngaithei lo em em a, social media-a sawiselna pawh an ngaithei loa, Narendra Modi kaihhruai BJP sawrkar kal dan an entawn a, anmahni sawiseltute an man a, an ban zel mai niin a sawi.
“Mizoram mipui hian chhanchhuaktu tur an duh a, keini hi huaisen taka kan penchhuah a ngai a ni,” a ti.
Tun tuma BJP sawrkarah Muslim minister an awm loa, India rama a vawikhatna a ni, tiin, “NDA hnuaiah hnam hnuaihnungte rahbeh leh nekchep an ni a, hnam hnuaihnung MP an tlem hle. INDIA Alliance ah chuan hnam hnuaihnung an tam em em a ni. Kan chhehvel hnamte chuan BJP leh an thawhpuite an hnawl a, Congress-in MLA a neih lohna Nagaland-ah Congress MP an thlangtling a, Manipur-ah pawh Congress MP an thlangtling a ni, Mizo mipui pawh kan inngaihtuah chian a ngai a ni,” Dr Lalmalsawma hian a ti.