Manager nei lo Burnley-in Van Nistelrooy an bia

PSV Eindhoven boss hlui Ruud van Nistelrooy kha English club Burnley chuan an manager ni turin an be mek a, he thu buatsaih lai hian Manchester United striker hlui chhanna hriat theih a la ni rih lo.
Football khelh a chawlhsan hnua coaching lam luhchilh Nistelrooy hian PSV kha match 47 chhung kaihruai hmanin, khati zat game-ah khan tum 29 chiah a chakpui a, an inthen zui ta a ni.
Kum 47 mi ni ve tawh Ruud van Nistelrooy be mektu Clarets hi season liamta khan Premier League atangin Championship lamah an tlathla leh ta rih a, an boss Vincent Kompany pawhin kumin May thla khan Bundesliga giants Bayern Munich lamah a chhuahsan a, head coach tur an melh mekna kawngah England-a tawnhriat nei tawh United forward hlui an rim mek a, Dutchman Van Nistelrooy bakah hian England international hlui pahnih Frank Lampard leh Scott Parker-te pawh Turf Moor club hian an be bawk tih BBC Sports chuan tarlangin, acting head coach-a an hman mek Wales international hlui Craig Bellamy pawh he post luah thei tura candidate pakhat a ni bawk.
Report-in a tarlan danin Netherlands chuan Van Nistelrooy hi an manager ni turin an befel tep tawh a, kum tam tak daih tur inremna ziahpui an remti niin tarlan a ni.
Senior management lamah Van Nistelrooy hian tawnhriat a la nei tam chiam lo a, 2022-23 season-ah khan PSV Eindhoven chu Dutch top flight (Eredivisie)-ah pahnihna nihpuiin, KNVB Cup a lakpui bawk.
Kan hriat tawh thin angin, Van Nistelrooy hian kum 2001 khan PSV atangin Red Devils a zawm a, Old Trafford club tana Premier League game 150 a khelhah goal 95 thun tlingin, kum 2006 khan Real Madrid lamah a insawn ta a ni.
Tuna Nistelrooy be mektu Clarets hian Henrik Jansen chu assistant first-team coach atan an ruat fel tawh.
Kum 39 leka upa la ni Dane hian Swedish side Kalmar FF atangin English club hi a zawm a; tunhmain Danish women’s team Fortuna Hjorring bakah IFK Norrkpping, Linkopings FC leh Midtjylland a lo enkawl ve tawh bawk.