Wimbledon champion Vondrousova a inhliam

A title kawl lai humhim tura chawlhkar hnih pawh hun a awm tawh kloh laiin Ningani khan Berlin Open-ah Czech Republic player Marketa Vondrousova a intina palh hlauh a, grass bika vawiriat a chak zawqn kal mekna pawh Anna Kalinskaya lakah tawpsanin, Berlin khaw tournament-ah hian second round a paltlang zo ta lo a, London khawpuia grand slam tournament khelh hun hma hian a dam fel hman dawn em hriat theih a ni rih lo!
Wimbledon champion Vondrousova hian set khatnaa 5-3-a hma a hruai mek laiin a khel dinglam a tina a, medical time-out nen han inenkawl ngial mah se game hnih a khelh leh hnu 5-5 a nih laiin a chhunzawm thei ta ngang lo a, Kalinskaya chu a peihlohsan ta a ni.
Russian Kalinskaya hian second round inkhel danga 6-1 6-4-a Daria Kasatkina hnehtu world number three Aryna Sabalenka a hmachhawn zui leh ang.
Grass-court tournament khelh chhoh leh mai tur Wimbledon hi thla thar July 1-14 chhunga khelh tura ruahman a ni a, fixture duanlawk dan chuan Vondrousova hian tournament ni hnihnaah a title kawl lai humhim tura a chetchhuah vawikhatna turin khelmual a lut ang.
Nikum final-ah khan kum 24 Czech kha unseeded player zinga Wimbledon women’s singles title la thei hmasaber niin, final-a a khingpui Ons Jabeur a hneh.
Berlin khawpuia Wimbledon inbuatsaihna tournament kal mekah hian hmeichhe world top 10 zinga pariat inlanin, chhuak lo chhunte chu top-ranked Iga Swiatek leh world number seven Jasmine Paolini-te chiah an ni.
Tunisian player Jabeur chuan set khat hloh zet chungin Linda Noskova lakah hnehna a chang a, quarter-final match-ah Coco Gauff nen an insu dawn a ni.
World number two Gauff hian Berlin khaw inkhel dangah 7-6 (8-6) 6-2-a Russian Ekaterina Alexandrova hnehin last eight a lut.
Kum 20 mi Gauff hi US women’s singles team-ah telin kan hma lawk Paris Games-ah hian a Olympic debut a nghakchhuak dawn a ni.
He American mihang player hian tleirawl a nih laiin Tokyo Olympics kha kum 2021-a hmachhawn tawh tur a ni a, mahse, Covid-19 a positive avangin tun hi Olympic-a a inlan vawikhatna tur a ni.
Olympics tennis inelna chu thla thar July ni 27 atang khian Roland Garros clay court-ah khelh tan a ni ang.
Third seed Elena Rybakina pawhin 6-4 7-5-a Veronika Kudermetova hnehin last-eight inkhel dangah world number one hlui Victoria Azarenka a hmachhawn dawn.
Wimbledon inbuatsaihna dang Birmingham Classic-ah Britain player Harriet Dart chu 6-3 6-4-in Czech second seed Barbora Krejcikova lakah a tlawm.
Nilaini khan Wimbledon championship tournament organiser-te chuan hmeichhe world number one hlui pathum – Angelique Kerber, Naomi Osaka leh Caroline Wozniacki-te chu main draw-a tel theihna wildcard an pek thu an puang.
Thla 18 zet nau neih chawlh a lak hnuah Kerber hi ranking-ah 224-na daih a ni tawh a, Wimbledon title hi kum 2018-ah la tawhin, kum 2017-ah runner-up a ni.