Ruahsurin tihchhiat nei nual

Kar kalta Zirtawpni zan leh Inrinni zing ruahsurah leimin leh che a awm nual a, chhiatna liantham tak thlen erawh a nei lo nia hriat a ni.
Sialhawk Dinthar Vengah kawngpui thlang lama in sak lai pahnih a chhia a. Laldawngliana in chu leiminin a hnawl chhe vek a; a bul ami Lalbiakhlua in sak pawh sak chhunzawm ngam a nih tawh dawn loh avangin Inrinni khawtlangin an thiat a ni. Sialhawk Power Sub Station panna kawngpui leh Thingaimual panna kawngpui pawh leiminin a hnawh ping nia thu dawn a ni.
Inrinni zing dar 5.50 vel khan New Serchhip South huamchhungah leiminin national highway a hnawh ping a, kawngchhak thing tluin electric hrui a vawchhia nia sawi a ni bawk.
Aizawl atanga Sairang panna, Phunchawng Mel 6-ah lirthei kaltlang theih lohin leimin kawngpui a hnawh ping a. Lengpui Airport panna a nih tel avangin PWD lamin thenfai hna an thawk nghal a ni.
Aizawl atanga Champhai panna kawngpui, Khawzawl thlen hma Khuailui bulah nasa takin lei a min bawk a, lirthei kaltlang theih a ni lo. Aizawl khawpui chhungah Falkland leh Thuampui inkarah leh Republic Veng leh Mission Veng inkalpawhnaah pawh lirthei kal tlang theih lohin lei a min a. Heng leimin tam zawk hi lirthei kaltlang theiha thenfai a ni tawh a ni.