Mizoram MP ruling lamah thu – Congress Thalai

Lok Sabha member tharte Parliament-a rinawmna thu tiamtira lakluh an nihnaah Mizoram MP Richard Vanlalhmangaiha chu Treasury bench-ah a thu a. Zawlpui nei lo tur anga sawi chu lemchanna mai a ni tih a lantira an ngaih thu Congress Thalai chuan an sawi.
Congress Thalai Hqrs. thuchhuak chuan, June 21-a chief minister Pu Lalduhoma’n Parliamentary Affairs minister Kiren Rijiju a hmuhnaah MP Richard Vanlalhmangaiha hi NDA ni lo, INDIA pawh ni lo tana thutna tur lo ngaihtuah sak tur leh House chhunga thusawina hun tam thei ang ber pe turin a ngen tih sawrkar thuchhuaha tarlan a ni tih a sawi. He ngenna Union minister-in bawhzui sak a lo tiam laiin, MP hian House-a thutiam a lakah Treasury bench ho oath taking laknaa a lak avangin a thutna lam a chiang ta tih a sawi a ni.
‘MP inthlan laiin Pu Richard Vanlalhmangaiha hian issue base-a a kal tur thu a sawi chu dawt a nih zia a lantir bakah Pu Lalduhoma pawhin thutna tur nei sa reng, zawlpui nei lo (others) thutnaa thu tur anga a zuk sawipui chu lemchanna mai a nih zia lantirnaah kan ngai a. Pu Lalduhoma’n Zohnahthlakte leh Kristiante nasa taka nghaisatu BJP Mizorama a len theihnana step kai dan tur a sawilawk leh ruahman chu a takin kan hmu chho a. An thusawi loh ang zela awm ZPM sawrkar Mizoramin kan tuar zel tur hi pawi kan ti takzet a ni,’ a ti.