LADC-ah MNF-in seat khat belh

June 27-a Lai Autonomous District Council (LADC) hnuaia 12-Lawngtlai Chandmary bial Member of District Council (MDC) seat ruak hnawhkhah nana by election buatsaiha vote tla chu Thawhtanni khan chhiar a ni a, MNF candidate C Lalsawmzuala chuan amah hnaih bertu aiin vote 285-a hmu tam zawkin thlantlin a ni.
Returning officer, Lawngtlai district election officer Cheemala Siva Gopal Reddy chuan thlantlin a nih thu hi puangin certificate a hlan nghal a ni.
By election ah hian political party pathumin official candidate an nei a. Vote awm zawng zawng 2798 atangin electronic voting machine-ah vote 2014 leh postal ballot-ah vote 47, a vaiin 2061 (73.66%) a tla a ni. C Lalsawmzuala (MNF) in vote 1161 a hmu a, ZPM candidate F Hrangtukhuma’n 876, BJP candidate K Lalawmpuia’n 19 hmu in NOTA-ah vote 5 a tla a ni.