HSS principal sawnkual dawn “Aizawl ami pawh kan sawn ang” – Education minister

Higher Secondary School principal engemawzat an sawn dawn a, Aizawl amite pawh an sawn dawn tih School Education minister Dr Vanlalthlana chuan a sawi.
School Education minister hi Lungleia a awm laiin MZP Hqrs. Hnahthial chuan an hmu a. Govt. Hnahthial Higher Secondary School-a irtirtu sawn chhuah a ai dah loh leh an principal sawn chhuak a, mi hrisel pangngai, school awmchilh thei tur dah an ngen a. Hnahthial district-a school hrang hrang, primary atanga higher secondary school thlenga zirtirtu indaih lohna pawh an thlen a ni.
Minister hian, lecturer transfer order chu tun dinhmunah ‘stay’ a ni a; Students – Teachers Rationalisation mila zirchian that leh a ni dawn tih a sawi a. Kumin chhung chuan transfer an nih loh tur thu a sawi. School zirtirtu indaih lohna pawh casual teacher lakin a phuhruk a ring tih sawiin, district khawpuia casual teacher dah an nih loh chungchangah, zirtirtu nghet dah tuma ruahman a ni tih a sawi.
Govt Hnahthial HSS principal chungchang pawh department chuan ngaihtuah tawhin, principal sawn chhuaha aiawh dah mai tur an van a, principal ni mek chu sawrkarin sawn chhuah a tum tih a sawi. July 4 hian department hotute an thukhawm anga, higher secondary school principal chin chu Group A an ni a, engemawzat an sawn dawn a, Aizawl amite pawh an sawn dawn avangin principal chu an neih beisei turin a hrilh a ni.
MZP Hqrs: Hnahthial hruaitute chuan, kumin July 10 ralhma ngeia school principal sawn chhuak a, a aiawh midang dah turin minister hi an ngen nawn a. Sawn chhuaha ai dah a nih loh chuan, Govt Hnahthial HSS zirtirtute leh zirlaite school kai tur tiamchin awm loa dan leh an tum thu an hrilh a ni.