Dan thar pathum zirchiang
Sawrkar laipuia Ministry of Information & Broadcasting leh Press Information Bureau Aizawl tangdun buatsaihin dan bawhchhiate hremna dan thar pathum chungchanga inhrilhin Nilaini khan Aizawlah ‘media workshop’ neih a ni.
Workshop hmanpuitu Assembly speaker Lalbiakzama chuan dan chu mi zawng zawng tana siam a nih angin, dan thar inhrilhhriat leh zirho buatsaih a ni chu lawmawm a tih a thu a sawi a. Heng dan thar hi kalphung mumal zawka Mizoramin kan hman theih nan a kaihhnawih department, a bikin Law department leh Home department te inbuatsaih chak a, dan siam a nih chhan mipui hrilhhriat chu darhzau taka kalpui a tul tih a sawi a ni.
Hmanpuitu dang IGP (Law & Order) Lalbiakthanga Khiangte chuan he dan thar hi ‘victim centric’ a nih dawn bakah mipui nawlpui, a bikin hmeichhia leh naupang a humhalh hle a, victim compensation pawh a ngaipawimawh hle, tiin, ‘justice delayed is justice denied’ tih piahlamah he dan hian kan justice system rei lutuk thin chu a ranglamin a chingfel zung zung tura beisei a ni tih a sawi. Case ngaihtuah lai pawh adjournment vawihnih aia tam phal a ni tawh lo a. Tunlai thiamna hmangin FIR leh thildang, electronic communication hmangin thehluh theih a ni tawh a. FIR copy pawh police hnen atangin a copy free-in a neih theih dawn a, pawikhawihna, hnuchhui dan, hmalakna leh thlen chin hriat theihna right a awm tawh dawn tih a sawi a ni.
Govt. Mizoram Law College associate prof. P Lalremruati chuan criminal dan thar pathum – Bharatiya Nyaya Sanhita 2023, Bahratiya Nagarik Suraksha Sanhita 2023 leh Bharatiya Sakshya Adhiniyam 2023 awmzia leh kalphung a zirtir a. Dan thar tih lemah, a thar hlak vek niloin, dan awmsa a la awm teuh tih a sawi. Police case chinfel loh awm tam lutuk tih tlemna tur, jail-a an case ngaihtuah lai mitang (UTP) tam lutuk thin an case chinfel zung zung theihna turte a awm tih a sawi bawk. Kumin July 1 atanga hman tan a nih avangin, hemi hmaa dan hlui anga case siamsakte chungthu chu case hlui anga bawhzui tur a ni dawn tih a sawi a ni.
Workshop-ah hian Mizoram Law College, MZU, IIMC zirlaite bakah MJA leh sawmbikte an tel a ni.